Май 11-де Тываның Баштыңы Владислав Ховалыг, август айда болуп эртер IV делегей чергелиг буддийжи шуулганга белеткенири-биле, найысылал Кызылда тудуг объектилерин хынаан.
Хыналда найысылалдың аэропортунуң чоогунда чаагайжыдылга ажылдары чоруп турар девискээрлерден эгелээн. ТР-ниң орук-транспорт комплекизиниң сайыды Шораан Чыргал-оолдуң удуртукчуга дыңнатканы-биле алырга, амгы үеде ында ийи хевирниң брусчаткаларын салып, машиналар тургузар шөлдү кылып турар.
"Удавас асфальт-бетон-биле шывар ажылдарже кирер бис. Оон ыңай маңаа автомобильдерни эрттирип тургаш, дугаарларын көрүп турар шлагбаум база 500 автомашина кирер ийи шөл база турар"— деп, Шораан Чыргал-оол чугаалаан.
Ооң соонда республиканың Баштыңы Кызылдың президентиниң кадет училищезиниң чоогунда чоруп турар чаагайжыдылга ажылдарын көрген. Аңаа Тываның Баштыңы ТР-ниң тудуг сайыды Артыш Кыргыс, Кызылдың мэри Айдың Сарыглар, тудуг компаниязы «Элита» КХН-ниң төлээзи Ваан Андрасян база өске-даа специалистер-биле кады орук кыдыынга бордюрларны салырын, тротуарларны кылырын, ооң ийи талазындан ногаанчыдарын сайгарып чугаалашкан.
Ооң соонда Владислав Ховалыг Кызылдың чумага удур станциязының девискээринге четкен. Аңаа Ангар бульварындан Московская кудумчузунда Салчак Тока кудумчузунуң талазынче долгандыр халдыр орукка чедир девискээрни эде кылыр планнарны сайгарып көрген.
Чаагайжыдылга специалистериниң Владислав Ховалыгга дыңнатканы-биле алырга, Московская кудумчузунуң Калинин талазынче чуртталга бажыңнарының кыдыын дургаар тротуарларны улаштырарын, бажыңнарның мурнуу талазын болгаш өске-даа чаагайжыдылгаларны немей кылырын планнаан.
Хыналданың түңнелинде Владислав Ховалыг харыысалгалыг кижилерге ажылды дүргедедирин дааскан. Ол ышкаш тус черниң сайгарлыкчыларын кел чыдар улуг хемчегге харыысалгалыг болурун база Кызыл хоорайның овур-хевирин чогуур деңнелге тудары-биле, боттарының садыг-саарылга кылып турар оран-саваларын белеткээринче кыйгырган.
"Бир кол чугула чүүлдү демдеглексеп тур мен: амгы үеде тудуп, септеп, чаартып турар бүгү чүүлдеривис дээрге бир дугаарында шуулганга эвес, а республиканың чурттакчыларынга эки болзун дээш кылып турар. Шуулган дээрге чүгле бо бүгү ажылды дүргедедиринге идиг-дир. Чаа оруктар, чаагайжыткан сесерликтер, бажыңнар болгаш оруктар Тывага хөй чылдарда артып каар. Аалчылар келгеш, бистиң культуравысты магадап көргеш, чоруй баарлар, а шынарлыг кылдынган хоорай хүрээлеңи, дыштанылганың болгаш чогаадыкчы чоруктуң чаа аргалары бистиң ажы-төлүвүске артар» — деп, Владислав Ховалыг түңнээн.
Чыжыргана СААЯ.
Чурукту «ТуваМедиаБөлүк» медээлер агентилелинден алган.
“Шын” №18 2026 чылдың май 14
"Шын" солуннуң МАХ-каналынга каттыжыңар max.ru/join/egenQ...