Июнь 23-те Тываның Чазааның бажыңынга ТР-ниң Баштыңы Владислав Ховалыг-биле «S7» компанияның чиңгине директору Дмитрий Куделькин кады ажылдажылганың дугуржулга-керээзин чарган.
Республиканың чурттакчы чонунуң аай-дедир аргыжылгазынга чугула херек керээге ийи тала атты салган соонда, массалыг информация чепсектериниң ажылдакчыларының айтырыгларынга харыылааннар.
«Керээниң ужур-утказы болза, Кызылдан Москваже дорт рейс болуп турар. Баштай неделяда ийи катап, а 2026 чылдың сентябрьдан эгелеп неделяда үш катап ужары планда көрдүнген. «S7» компанияның чиңгине директору Дмитрий Куделькин-биле өске хоорайларже угланыышкыннар дугайында база чугааны кылдывыс. Томск, Иркутск, Даг-Алтайже маршруттарны ажыдары планда бар. Кызылдың аэропортунга делегей чергелиг пассажирлер аргыштырылгазын хөгжүдер талазы-биле база элээн чугаалаштывыс. «S7»-биле ажылдаары Тываның чурттакчы чонунга ажыл-агый аайы-биле азы аян-чоруктап аай-дедир аргыжарынга эптиг байдалдарны тургузуп, республиканың экономиктиг хөгжүлдезинге бурунгаар идигни бээр дээрзинге бүзүрээр мен. Чаңгыс чер чурттугларывыс Россияның найысылалынга хүн бүрүнүң янзы-бүрү хереглелдери-биле чедип алырынга эптиг байдалдар тургустунган» – деп, ТР-ниң Баштыңы Владислав Ховалыг чугаалады.
Оон аңгыда Кызылдан Томск болгаш Иркутск хоорайларда өөренип турар студентилерге база өске-даа чорук-херектиг чонувуска рейстер «S7»-биле катап эгелээриниң барымдаалары бар. Оон ыңай Алма-Ата болгаш Урумчиже рейстер дугайында база чугаалашканнар.
«ТР-ниң Баштыңының күжениишкинниг ажыл-ижиниң ачызында «S7» 2023 чылда Тыва-биле ажылдап эгелээн турган. Ынчан Кызыл – Новосибриск аразынга рейс ажыттынган турган. Бөгүн Кызыл биле Москва аразынга рейстер ажыттынып турары бо. Кады ажылдажылгавыстың моон-даа соңгаар сайзыраар дээрзинге бүзүрээр мен. Алызы барып даштыкыже рейстер ажыдарының магадылалы бар» – деп, Дмитрий Куделькин чугаалады.
Дмитрий Куделькинниң онзалап демдеглээни-биле алырга, Тывада ук авиакомпания 2023 чылдан эгелеп ажылдап эгелээн. Бо үениң дургузунда Кызыл биле Новосибирск аразынга рейстерниң саны үш катап көвүдээн.
«Тываның чурттакчылары Толмачево аэропортун таварыштыр Россия иштинде болгаш делегей чергелиг 70 ажыг аңгы угланыышкыннарлыг рейстерни ажыглап болур аргалыг. Тываның чурттакчы чонунга аай-дедир аргыжылгага, аян-чоруктаарынга эптиг байдалдарны тургузары-биле ол угланыышкынны ам-даа сайзырадыр аргаларын өөренип көөр бис» – деп, Дмитрий Куделькин немеди.
Тыва Республиканың орук транспорт сайыды Шораан Чыргал-оолдуң демдеглээни-биле алырга, сөөлгү беш чылда Кызылдың аэропортунга пассажирлер аргыштырылгазы чылда 30 муңдан 140 муң чедир көвүдээнин демдеглээн. Регионда агаар-биле аргыжылга турум хөгжүп эгелээн. Амгы үеде үш авиакомпания республикаже рейстерни чорудуп турар.
Ийи тала Моол, Казахстан, Кыдат дээн ышкаш делегей чергелиг угланыышкыннарны хөгжүдер аргаларны база субсидиялыг ужудуушкуннарның санын көвүдедириниң дугайында сайгарып чугаалашкан.
/ А. ОНДАР.
Буян ООРЖАКТЫҢ тырттырган чуруу.
“Шын” №24 2026 чылдың июнь 25
"Шын" солуннуң МАХ-каналынга каттыжыңар: max.ru/join/egenQ...