Тускай шериг операциязының киржикчизи, Россияның Маадыры Найыр Кыргыс-биле Тываның Одаар чүүл болгаш энергетика яамызының ажылдакчылары болгаш сайыт Эдуард Куулар ужурашкан.
Шериг албан-хүлээлге эрттирип чоруурунуң мурнунда Тываның политехниктиг техникумунга “электри станциялары болгаш четкилери, оларның релейлиг камгалалы болгаш автоматизациязы” мергежилинге өөренип турганын, техникумну дооскаш, техник-электриктиң дипломун алыр ужурлуг турганын, ынчалза-даа дайынчы албан-хүлээлгезин эрттирери-биле шеригже эки тура-биле чорупканын, Россияның Камгалал яамызы-биле керээни чаргаш, тускай шериг операциязынга киржи бергенин Найыр Кыргыс ужуражылганың киржикчилеринге чугаалап берген.
Тускай шериг операциязының үезинде Гуляй-Поле, Запорожье угланыышкыннарга тулчуушкуннарга эрес-дидим киришкеш, Найыр Кыргыс Россияның Президентизи Владимир Путинниң Чарлыы-биле Россияның Маадырының Алдын Сылдызы-биле шаңнаткан. Бедик дайынчы шаңналды Найыр Кыргыска Россияның камгалал сайыды Андрей Белоусов боду тывыскан.
Тускай шериг операциязынга Тываның энергетиктери база киржип турарын сайыт Эдуард Куулар демдеглээш, оларның аразындан 21 харлыг Найыр Кыргыс эң аныяа болганын дыңнаткан.
Ужуражылганың киржикчилери Россияның Маадыры Найыр Кыргыс-биле чурукка тураскаалга тырттырып алганнар. Найыр Кыргыс шериг форма хеп кетпээн, дайынчы орден-хавыяазын хөрээнге астып албаан болза, үе-чергези өске оолдардан ылгалбас, шоолуг-ла чугаакыр эвес, келир үеде оларның-биле ажылдаар бөдүүн оол болганын ооң-биле ужурашканнар магадап ханмааннар.
Мерген КЫРГЫС.
Буян ООРЖАКТЫҢ тырттырган чуруу.
“Шын” №20 2026 чылдың май 28
"Шын" солуннуң МАХ-каналынга каттыжыңар: max.ru/join/egenQ...