Октябрь 3-те Борбак-оол Араптан аттыг Сукпактың ортумак школазынга Украинага тускай шериг операциязының үезинде дайынчы албан-хүлээлгезин эрес-дидими-биле күүседип тургаш, амы-тынындан маадырлыы-биле чарылган Ай-Херел Аясович Кууларның адын «Маадырның партазынга» мөңгежиткен.
Девиденчиг, карак чажы-биле холбашкан Маадырга хүндүткелдиң, мөгейигниң ёзулалынга ооң ада-иези, төрелдери, өөренип чораан школазының улуг классчылары, башкылары, ТР-ниң Шериг комиссарының оралакчызы, подполковник Евгений Терехов, ТР-ниң Аныяктар херектериниң талазы-биле агентилелдиң удуртукчузу Эртине Куулар, Кызылда 55-ки тускай мото-адыгжы (даг) бригадазындан, ТР-ниң Эртем болгаш өөредилге яамызындан, Кызыл кожууннуң өөредилге эргелелинден төлээлер болгаш өскелер-даа кээп киришкен.
Ада-иезиниң кара чаңгыс оглу, өг-бүле тудуп, салгал безин арттырып четтикпээн Маадыр дугайында сөс алганнар ооң дугайында чырык сактыышкынны кылган. Маадырның школага кандыг өөренип чораанын, бичиизинден тура канчаар өзүп келгенин көрген башкылары улуг хараадал-биле чугаалап турган.
Сара Ооржак, Ай-Херел Кууларның 5-тен 9-ку класска чедир клазының башкызы:
– Биске дыка харааданчыг, берге-дир. Бичиизинден тура кончуг кижизиг, дузааргак, кандыг-даа даалга алгаш, ону дораан күүседиптер идепкейжи өөреникчим турган. Класска, школага-даа улуг хемчеглер болурга, команданың албан капитаны болуп турган. Боду спортчу, бүзүрелдиг, чеже-даа өг-бүлениң чаңгыс оглу турган болза, эргээ өөренмээн, эш-өөрзүрек чораан оол чүве. Шак ындыг шынарлары-биле эш-өөрүнге, башкыларынга хүндүткелдиг турган-даа болза, кажан-даа оозунга менээргенмес, бөдүүн сеткилдиг турду. Авазы Анжела Куулар клазывыстың ада-ие комитединиң даргазы турган. Аңаа мөгеер-дир бис. Ооң шын кижизидилгезинден оглу Төрээн чурт мурнунга хүлээнген даалгазын амы-тынын харамнанмайн күүсеткеш, бо хүнде ёзулуг Маадыр болганынга чоргаарланыр бис, чүгле дириг турган болза, оон-даа өөрүнчүг турар ийик. Ынчалза-даа Ай-Херел кезээ мөңгеде бистиң чүректеривиске Маадыр болуп артып каар.
Чаңгыс оглун чидирген авага ол хүн кайы хире берге болуп турганын шупту билип турган. Анжела Мергеновна Куулар ол хүн сөс алгаш, оглунуң чырык адын шак мынчаар мөңгежидип турарынга өөрүп четтиргенин илереткен.
“Маадырның партазының” артынга моон соңгаар чүгле тергиин өөредилгелиг, сагылга-чурумнуг өөреникчилер олурар дээрзин башкылар чугаалаан. Оларның бирээзи 7 “Д” класстың өөреникчизи Айдың Чыргал-оол чыылганнар мурнунга Маадырга төлептиг болуп, моон-даа соңгаар эки өөренирин даңгыраглаан.
Ай-Херел Аясович Куулар 9 класс дооскаш, 2018 чылда Кызылдың транспорт техникумунче өөренип киргеш, 2021 чылда ортумак тускай эртемни чедип алгаш, Брянск облазының Клинцы хоорайында 144 гвардейжи мото-адыгжы дивизияның 12721 дугаар шериг кезээниң адыгжызы болуп шериг албанын эрттирип тургаш, Украинага тускай шериг операциязынга эрес-дидим киришкеш, 2022 чылдың март айның 20-де маадырлыы-биле амы-тынындан чарылган.
2022 чылдың апрель 7-де Россия Федерациязының Президентизиниң 78730 дугаарлыг Дужаалы ёзугаар “Эрес-дидим чорук дээш” деп орден-биле мөчээн соонда шаңнаан.
Эрес-дидим, коргуш чок, даңгыраанга болгаш албан-хүлээлгезинге шынчызын көргүзүп, тайбың дээш амы-тынын өргээн Маадырлар уттундурбас. Маадырның дугайында чырык сактыышкын Тываның чурттакчыларының чүрээнге артар.
К. МОНГУШ.
Айдың КУУЛАРНЫҢ тырттырган чуруктары.
