Декабрь 4-те Чеди-Хөл кожууннуң “Таңды-Уула” аттыг культура бажыңының спортчу залынга ТШО-нуң киржикчизи Чимит Юрьевич Күрүжептиң чырык адынга тураскааткан республика чергелиг бут бөмбүүнге маргылдаа болуп эрткен. Чимит Күрүжеп тускай шериг операциязынга киржип тургаш, маадырлыы-биле амы-тынындан чарылган. Ол Хову-Аксы ортумак школазының доозукчузу, Эрес-дидим чоруктуң кавалери деп орденниң эдилекчизи.
Маргылдааны маадырның төрелдери, эш-өөрү, спорт школазы, Чеди-Хөл кожууннуң чагыргазы организастап эрттирген.
Ниитизи-биле 12 команда спортчу мергежилин, боттарының бедик белеткелин көргүскен. Түңнелинде, Хову-Аксындан “Хүрегечи” командазы тиилээн. Сайлыг суурдан “Огневка” 2-ги черге төлептиг болганнар. Мөңгүн-Тайганың “Меңгилиг” бөлүү 3-кү черни алган. Межегей уургайының “Шахтерлары” 4-кү черни чаалап алганнар.
Маргылдааның киржикчилеринге болгаш келген аалчыларга маадырның кырган-авазы болгаш дуңмазы Чаяна Күржеп, ТР-ниң Чазааның аппарадының Регионалдыг айыыл чок чорук департаментизиниң даргазы Айбек Конгар, Чеди-Хөл кожууннуң чагырга даргазы Адыгжы Араптан, чагырга даргазының айыыл чок чорук, хоойлу-дүрүм үрээшкиннерин болдурбазының талазы-биле оралакчызы Айрана Маспын-оол олар байырын чедирип, маадыр дугайында чылыг-чымчак сөстерни чугаалаан.
Маадырның төрелдери маргалдаага киржип келгеннерни чылыы-биле уткуп хүлээп, келгени дээш өөрүп-четтиргенин илередип, изиг аъш-чем-биле ашкарып чемгерген.
Мөңгүн-Тайгадан, Улуг-Хемден, Кызыл хоорайдан келген ойнакчыларга оруктуң ырак-узаа дивейн чедип келгенинге чеди-хөлчүлер өөрүп четтиргенин илереткеннер.
