Бөгүн, май 24-те славян бижиктиң болгаш культураның хүнүн Россия, Белоруссия, Болгария, Соңгу Македония, Сербия, Чехия, Молдова дээш өске-даа чурттар демдеглеп турар.
Байырлалды 1863 чылдан тура, Кирилл база Мефодий алышкыларның славян бижикти чогаатканындан бээр 1000 чыл оюндан демдеглеп эгелээн.
Совет үеде 1985 чылга чедир байырлал уттундурган турган. 1985 чылда Мефодийниң 1100 харлаанында славян бижиктиң болгаш культураның хүнүн катап байырлап эгелээн. 1991 чылдан тура күрүне байырлалы кылдыр бадылаан. 2010 чылга чедир Россияның кандыг-бир хоорайын ук байырлалдың төвү кылдыр чарлап турган болза, 2011 чылдан тура байырлалдың төвү Москва кылдыр шилиттинге.
Байырлалды канчаар демдеглеп турарыл?
Школаларга төрээн дыл кичээлдерин Кирилл база Мефодийниң славян чоннарның дыл болгаш культуразының сайзыралынга киирген үлүг-хуузун таныштырары-биле эртем конференциялары, концерттер, фестиваль, ярмаркалар болуп турар.
Байырлалдың кол кезээ - орус чечен чогаалдың сайзыралынга улуг үлүүн киирген амгы үениң авторларынга шаңналдар тыпсыры. Оларга орус православ шажынның Ыдыктыг синодунуң Кирилл болгаш Мефодийниң адынга тураскааткан шаңналды тыпсыры байырлалдың бир чаңчылы болур. Эртем конференцияларынга амгы үеде дылга хамаарылгалыг чидиг айтырыгларны сайгарып, тускай мергежилдиглер арга-дуржулга солчурлар.
Славян дылдарның бөлүүнче 13 аңгы дыл кирип турар. Ук дыл кырында 400 сая ажыг кижилер чугаалажып турар. Бурунгу славян алфавит чүгле 29 үжүктен тургустунган. Оларны Азь, Буки, Веде, Глаголь, Добро, Жизнь, Земля, Кормилица, Люди, Наш мир деп адаар турган. Алфавитти долузу-биле номчуурга, дараазында кыйгырыг бижик көстүп келир: "Я Бога Ведаю. Говорю и делаю Добро. Добро Есть Жизнь. Живите Землею,она кормилица наша. И Как мы Люди Мыслим таков и Наш мир".
Чурукту интернет четкизинден алган.