Бүгү чуртта, ооң иштинде регионнарда база, Ада-чурттуң Улуг дайынының 17 муң киржикчилери болгаш инвалидтери чурттап турар.
«Чаңгыс демниг Россия» партия биле «Тиилелгениң волонтёрлары» шимчээшкининиң идепкейжилери фронтучуларга белек-селекти тыпсыр, оларның чурттап турары бажың-балгадының хериминиң иштинге белеткел чок чогаадып каан парадтарны организастаар.
«Бистиң хайыралыг фронтучуларывыс дайын-чааның аар кадыг-бергелерин шыдажып эрткеш, тиилелгени чаалап эккелгеннер. Оларның арга-дуржулгазын, мерген угаанын, сактыышкыннарын амгы болгаш келир салгалдарга дамчыдып чедирер хүлээлгелиг бис. Биске аяс дээрни болгаш чуртувусту кадагалап арттырып берген маадырларга бөгүн “Четтирдим дээр арга-шинек бисте тыптып келген” — деп, Күрүне Думазында хамааты ниитилелди хөгжүдериниң талазы-биле комитеттиң оралакчы даргазы, «Тиилелгениң волонтёрлары» шимчээшкинниң даргазы Ольга Занко чугаалаан.
Ооң чугаазы-биле алырга, дыка хөй аныяктар Ада-чурттуң Улуг дайынының хоочуннарынга амы-хууда байыр чедирер күзелдиглер.
«Мындыг чергелиг ужуражылгалар бистиң чүректеривиске балалбас истерни арттырып каар, чүге дизе чүгле хоочуннуң бодундан дыңнаан төөгү сеткил-сагыжывысты ханызы-биле шонуп болур. Дайын-чааның киржикчизиниң бодундан бистиң чонувустуң шыдажып эрткен чииртимнерин билип алгаш, ооң катаптаашкынын болдурбас дээш, бүгү-ле чүлдерни кылыр апаар сен” — деп, Ольга Занко чугаалаан.
Ол ышкаш «Чаңгыс демниг Россияның» болгаш «Тиилелгениң волонтёрларының» идепкейжилери Ада-чурттуң Улуг дайынының киржикчилериниң акы-дуңмалышкы чевег-хөөрүнге болгаш тураскаалдарынга чечектерни салырлар. Дайынчы эш-өөрүнүң тураскаалын сактыр езулалга киржир шинээ чок фронтучуларның орнунга олар чечектерни салырлар.
Күзелдиг кижи бүрүзү хоочуннарга чагаа-хорааны бижип болур, а «Тиилелгениң волонтёрлары» оларны адрестээн кижилеринге чедирип бээр. Ол ышкаш партияның, “Чаңгыс демниг Россияның Аныяк гвардиязының” идепкейжилери Ада-чурттуң Улуг дайынының киржикчилериниң болгаш инвалидтериниң бажыңнарының чанында херим иштин аштажыр, соңгаларының баарынга чечектерни тарыыр. Оон аңгыда, «Чаңгыс демниг Россия» биле «Тиилелгениң волонтёрлары” ол үениң маадырларынга болгаш болуушкуннарынга тураскааткан тураскаалдарга, а ол ышкаш дайынчы чевег-хөөрлерге чаагайжыдылга ажылдарын чорудар.
А. ХЕРТЕК белеткээн.