Мал чемин ажыл-агыйларга үлээн.

Кыштаглаашкын үезинде мал бажының чидириин болдурбазы-биле, республика фондузундан мал чемин хереглелдиг ажыл-агыйларга үлеп, деткимчени көргүзер даалганы Көдээ ажыл-агый яамызынга Владислав Ховалыг берген.

Неделя санында чер-черлерде байдалды анализтеп, херек апарза, муниципалитеттер аразынга мал чемин чедиштир хуваарын организастаар деп негелдени салган.

Республикада агаар-бойдус таарымча чок болуп турза-даа, кыштаглаашкан ажырбас эртип турарын, регионнуң Көдээ ажыл-агый яамызы дыңнаткан. Үргүлчүлелдиг хар чаап, хадыза-даа, малдың деңгели шыырак дээрзин специалистер демдеглээн.

Көдээ ажыл-агый ведомствозунуң дыңнадып турары-биле алырга, эрткен неделяда Таңды кожууннуң курлавыр фондузундан 9 тонна сигенни Сүт-Хөлдүң, 31,5 тоннаны Чөөн-Хемчиктиң малчыннарынче чоруткан. Каа-Хемниң курлавыр фондузундан 33 тоннаны Бай-Тайганың, 31,5 тоннаны Барыын-Хемчиктиң малчыннары алган. Эрзин кожуун – 17,5 тонна, Тес-Хем кожуун база ол-ла хире мал чемин Өвүр кожууннуң муниципалдыг курлавыр фондузундан алган. Өвүр база Бии-Хем кожууннардан 16,2 тонна сигенни Мөңгүн-Тайга кожуунда чедире берген. Ол мал чемнерин ажыл-агыйлар аразынга хувааган.

Көдээ ажыл-агый яамызы ооң-биле чергелештир муниципалдыг тургузугларның көдээ ажыл-агый эргелелдериниң тургускан даңзызы езугаар, харык-шинээ кошкак, хереглелдиг улуска дузаны көргүзери-биле, Красноярск крайның Курагино районундан мал чемин садып эккээр ажылды организастаан.

Тывада өнчүнүң шупту ажыл-агыйларында бо чылын 3292 кыштагда мал кыштап турар. Ажыл-агыйларда 372,3 муң баш мал бүрүткеттинген. Шээр малдың баш саны – 1 млн 280,3 муң, улуг бода малдың – 191,8 муң, чылгы малдың – 95,6 муң баш. 10,9 муң баш хаван, 2,3 муң – сыын болгаш иви, 252 баш теве кышты эртип турар.

Тываның Чазааның парлалга албаны.