Тываныӊ Баштыӊы Владислав Ховалыг кожууннарныӊ болгаш республиканыӊ курлавырынга мал чемин көвүдедир белеткээрин дааскан.
Ук даалганы Көдээ ажыл-агый яамызы биле кожуун чагыргалары күүседир. Сиген-ширбиил эки үнген черлерге мал чемин демниг белеткээри-биле көдээниң чурттакчыларыныӊ күжүн мөөӊнеп, бригадаларны тургузар.
Күрүнениӊ деткимчези-биле көдээ ажыл-агый техниказы садып алган бүдүрүкчүлер 625 тонна сигенни республиканыӊ мал чеминиӊ курлавырынга дужаар ужурлуг.
Кожуун бүрүзү мал чеминиӊ курлавырынга 1529 тонна сигенни белеткээрин планнап турар.
Чамдык кожууннарда сиген шөлү чедишпейн, оларга Убса-Нур ыйгылаажыныӊ девискээринден кезек участоктарны бээр.
«Центральная» машина-трактор станциязынын бригадазы сиген-ширбиил белеткээр ажыл-агыйларга дузалажыр.
Мал чеминиӊ белеткелин кожуун чагырыкчылары боттары үргүлчү хынаар ужурлуг дээрзин Тываныӊ Баштыӊы айыткан.
Таӊды, Чаа-Хөл, Каа-Хем, Кызыл, Чөөн-Хемчик биле Улуг-Хем кожууннарда мал чеми белеткээр кампания кидин түлүк чоруп турар. Ниитизи-биле 740 тонна мал чемин ажаап алган. Таӊды кожуун 510 тонна мал чемин ажаап алгаш, хамык кожууннарныӊ мурнунда келген.
Республикада чайгаар өзүп турар сигенниӊ бедии – 23 см, чаӊгыс чыл өзер тарымал үнүштерниӊ 18 см, хөй чыл өзер тарымал үнүштүӊ – 23 см. Шинчилеп көөрге, эӊ-не бедик 23–56 см хире сиген-ширбиил Каа-Хемде, Таӊдыда, Чаа-Хөлде болган.
Хуу дузалал ажыл-агыйлары мал чемииӊ 46,2 хуузун, арат-фермер ажыл-агыйлар 41,1 хуузун, көдээ ажыл-агый бүдүрүлгелери 12,7 хуузун белеткээн.
Тываныӊ көдээ-ажыл агый сайыды Алдай-Мерген Ховалыг мал чемин баштай белеткеп эгелээн Таӊды биле Кызыл кожууннарны барып хынап чораан. Таңды кожуун – 510, Кызыл кожуун – 76 тонна мал чемин белеткеп четтигипкен болган.
Ол «Дамды» көдээ ажыл-агый кооперативиниӊ тараа шыгжаар уургайын тудар черге база чораан. Тараа уургайын Тыва Республиканыӊ социал-экономиктиг хөгжүлдезиниӊ бот-тускайлаӊ программазыныӊ акшаландырыышкыны-биле кылыр. Кызыл кожууннуӊ Баян-Колда суггарылга системазын база хынап чораан.
Көдээ ажыл-агый яамызының медээлеринден.