Мал эмчилери Хүүректигге четкен
Сүт-Хөл кожууннуң ветеринария эргелелиниң ажылдакчылары Хүүректиг деп черде малчыннарга аалдап четкен.
Мал эмчилери шээр болгаш бода малга калчаа аарыынга удур тарылганы чоруткан. Ветеринарлыг профилактиканы шын болгаш үезинде чорударга, малга аарыг тывылдырбас, ол ышкаш аарый бээрге, эмнээр чарыгдалдарынга камналгалыг болур.
Эрзинниң эки турачылары
Республикага Волонтерлар хүнүнге тураскааткан янзы-бүрү хемчеглерни организастаан. Эрзин кожууннуң Мөрен болгаш Бай-Даг сумуларының эки турачылары идепкейин көргүскеннер. Олар хоочуннарга болгаш мобилизацияже келдирткен чаңгыс чер чурттугларының өг-бүлелеринге кыжын одаар ыяжын чарып, белеткеп берген.
Бедик көдүрлүүшкүннүг тудуг
Бии-Хем кожууннуң Сесерлиг сумузунда «Сорунза» губернатор төлевилели-биле кылып турар Культура бажыңының тудуу адакталган. Тудугжуларга культура, өөредилге, эмнелге болгаш чагырга ажылдакчылары график езугаар дузалажып турар. Шак-ла мындыг бедик көдүрлүүшкүннүг ажылдаар болза, тудуг декабрь 20-де доостур.
Аъттарга чайынналыр ленталар
Бии-Хем кожуун чагыргазының ажылдакчылары федералдыг Р-257 трассаның чоогунда одарлап чоруур мал-маганның ээлерин илередип тывары-биле, үнүүшкүннү кылган. Сесерлиг, Уюк, Суш сумуларга база Ленинка арбанга четкеннер.
Мал-маган ээлеринге тайылбыр ажылдарын чоруткаш, 18 дыңнадыышкын болгаш удуртулгаларны база аъттарынга 35 метр чырык чайынналдырар ленталарны үлеп берген. Ол ышкаш автоинспекция ажылдакчыларынга автомашиналар ээлери-биле моон соңгаар кады ажылдаарынга орук шимчээшкининиң айыыл чок чоруунуң дугайында удуртулгаларны «Шивилиг» постузунга арттырган.
206 өг-бүлеге хөмүр-даш
«Социал хөмүр» губернатор төлевилели-биле Барыын-Хемчик кожууннуң хөй ажы-төлдүг 206 өг-бүлезин хөмүр-даш-биле хандырган. Социал хөмүрнү октябрь 23-тен тура дажып эгелээн.
Ноябрь 19-ка чедир 9 сумуга хөмүр-даш чедирер ажылды организастаан: Аяңгатыга – 12 өг-бүлеге, Бижиктиг-Хаяга – 13, Эрги-Барлыкка – 24, Аксы-Барлыкка – 18, Хөнделеңге – 5, Барлыкка – 22, Шекпээр сумузунга – 21, Кызыл-Мажалыкка – 78, Ак сумузунга – 13 өг-бүлеге.
Россияның Маадырының адын мөңгежиткен
Улуг-Хем кожууннуң Арыг-Үзүү ортумак школазы 75 чыл оюн демдеглээн. Байырлыг хемчеглер үезинде школаның ханазынга мемориалдыг самбыра азар езулал болган.
«Бистиң школавыска Россия Федерациязының Маадыры Мерген Очур-оолович Донгак өөренип турган» деп мемориалдыг самбырада сиилбээн.
/ А. АРАКЧАА белеткээн.
