Тываның күрүне университединде делегей чергелиг IV сарыг шажын шуулганынга уткуштур волонтёрларга колл-төптү албан ёзузу-биле ажыткан. Россияның аңгы-аңгы булуңнарының эки турачылары билдинмес айтырыгларны билип алыр аргалыг апарган. Төптүң ажылында университеттиң шупту факультеттериниң студентилери хаара туттунган.
Тываның күрүне университединде 10 ажылдаар олуттуг, дериг-херекселдерлиг делгем өрээлде чаа колл-төп телефон дамчыштыр келген айтырыгларга харыылаарынга бүрүнү-биле белен. Ону Кызылга болуп эртер делегей чергелиг IV сарыг шажын шуулганынга уткуштур ажыткан. Төптүң бирги чадазының кол сорулгазы – чурттуң аңгы-аңгы булуңнарындан волонтерларга информастыг деткимчени көргүзери. Тускай шилилгени болгаш белеткелди эрткен Тываның күрүне университединиң студентилери янзы-бүрү айтырыгларга харыылаар.
Амгы үеде колл-төп волонтёрларга деткимче көргүзүп турар-даа болза, дараазында оларның ажылы делгемчиир. Организакчылар төлевилелди калбартырын планнап турар.
«Ниитизи-биле 1374 волонтёр дилег билдириишкинни киирген, оларның 350-и июнь төнчүзүнде шилиттинер. Олар шупту август айда болур делегей чергелиг IV сарыг шажын шуулганынга ажылдаар. Шупту волонтерларны углап-баштаар кылдыр колл-төптүң ажылын калбартырын планнап турар. Шуулган үезинде маңаа Сагыш салыышкын албаны ажыттынар»– деп, Тываның аныяктар эгелээшкиннериниң деткимче төвүнүң директору Кежиктиг Түлүш чугаалаан.
Тывада мындыг хевирлиг хемчегни бир дугаар эрттирер деп турар-даа болза, тус черниң волонтерларының арга-дуржулгазы улуг, олар “уйгу-чыдын чок” ажылдаарынга амдыгааштан белен.
Тываның күрүне университединде колл-төп делегей чергелиг IV сарыг шажын шуулганының волонтёрларынга деткимче шөлү кылдыр ажылын эгелээн. Удавас ол долу эргелиг Сагыш салыышкын албанынче шилчип, делегей чергелиг хемчегниң шупту киржикчилеринге арга-сүмезин берип, углап-баштаар апаар. Билдинмес айтырыгларны колл-төптүң 89233882000 деп дугаарынче долгааш билип алыр.
Бистиң корр.
Чурукту “Тува24-тен” алган.
“Шын” №19 2026 чылдың май 21
"Шын" солуннуң МАХ-каналынга каттыжыңар max.ru/join/egenQ...