Федералдыг сайыт регионнуң Баштыңы Владислав Ховалыг-биле кады республиканың эмнелге албан черлерин хынаан. Бирги удуртукчулар эге баштай Кызылда Республиканың консультативтиг-диагностика төвүнге четкен. Чурттуң Президентизи Владимир Путинниң даалгазын күүседип, 2021 чылда РФ-тиң Камгалал яамызы чаңгыс аай төлевилел-биле хөй угланыышкынныг ажыл-чорудулгалыг төптү туткан.
Республиканың консультативтиг-диагностика төвүнүң кол эмчизи Долаан Калбак регистратурага аалчыларны уткуп, эмнелге албан черин таныштырып, төптүң ажыл-чорудулгазының көргүзүглерин дыңнаткан. Улаштыр төптүң ачы-дуза чедирилгезиниң угланыышкыннарын көргүскен.
Чаа эмнелге албан чери Кызылдың 54 муң хире чурттакчыларын хаара туткан, хүнде-ле 300 хире кижини хүлээп турар. Онкологтуг дуза болгаш амбулаторлуг кезиишкин төптеринден аңгыда, ында 10 салбыр база клиниктиг-диагностика лабораториязы ажылдап турар. Кадыкшылы кызыгаарлыг кижилерге таарымчалыг байдалдарны тургускан, шимчээри кызыгаарлыг кижилерге аңгы кирер эжикти, автомашиналар тургузар улуг шөлдү тускайлаан.
Михаил Мурашко биле Владислав Ховалыг хөй угланыышкынныг ажыл-чорудулгалыг төптүң составында онкологтуг дуза төвүн, амбулаторлуг хирургия төвүн база көргеннер. Ол ышкаш диагностика салбырының, терапия участоктарының ажылын сонуургаан.
Эмнелге төвү хоорайның төвүнден ырак эвесте чаа микроройонда. Эмчилер кээр кижилерге эптиг болзун дээш, төптен ырак эвесте хөй-ниити транспортунуң доктаамын кылган, ол угже хоорай транспортунуң элээн каш маршруттары халдып турар.
Объектини дыка кыска хуусаада тутканын демдеглезе чогуур. Президентиниң даалгазы-биле чурттуң 15 регионунда шак-ла ындыг объектилерни туткаш, ажыглалче киирген.
