Москва хоорайга Төрээн дыл хүнүнге тураскааткан диктант бижиир культурлуг хемчег болган (сентябрь 4 – Хакас дыл хүнү, октябрь 20 – Алтай дыл, ноябрь 1 – Тыва дыл хүнү). Ол хемчегге Москва хоорайда тыва, алтай, хакас землячестволарның, ол ышкаш Россия Федерациязының Соңгу чүгүнүң, Сибирьниң база Ыраккы Чөөн чүгүнүң эвээш санныг чоннарының 50 ажыг төлээлери киришкен.
Культурлуг хемчегни аныяктар аразынга төрээн дылдарны сайзырадыр болгаш нептередиринче угланган амгы үениң аныяктарының «ЛИЦА» деп девискээринге эрттирген. Националдар аразынга бирги диктант В.Д. Поленов аттыг Россияның чоннарының культура төвү биле Москва хоорайда Тыва болгаш Алтай республикаларның төлээ черлериниң кады ажылдажылгазының түңнели болган.
35 минута үргүлчүлээн диктантыда 25 айтырыг бар, ооң иштинде 10-у Россияның культуразынга хамааржыр, 15-и Тываның, Алтайның болгаш Хакасияның этнокультуразынга тураскааткан. Ол ышкаш киржикчилерге төрээн дылдың чугулазының дугайында база ону кадагалаары болгаш сайзырадырының талазы-биле бодунуң бодалын үлежирин саналдаан. 30 ажыг кижи төрээн дылдарынга харылзажыр хүрээлеңни тургузарының чугулазын демдеглээн. Өскелери амгы үеде төрээн дылынга чугаалажырга, модада апарган, ынчангаш төрээн дылынга чугаалажып чоруур чоок кижилери-биле харылзаа тударын деткип турар.
Тыва дылга диктантыны Седен Сат, Айыс Монгуш, Айлуна Самбыл, Серен Ондар эң-не эки бижээн.
В.Д. Поленов аттыг Россияның чоннарының культура төвүнүң удуртулгазы Москва хоорайда Тыва Республиканың төлээ чериниң бүрүн эргелиг төлээлекчизи Чечена Чоксумга Төрээн дылдар хүнүнге тураскааткан диктантыны организастаарынга деткимчени көргүскени дээш өөрүп четтиргенин илереткен.
Москвада ТР-ниң бүрүн эргелиг төлээ чериниң медээзинден.
“Шын” №83 2023 чылдың ноябрь 1