Чедиишкиннер делгелгези-биле кады эртип турган хөгжүлде болгаш национал төлевилелдер стратегияларының айтырыгларының талазы-биле Тываның Баштыңының чанында Чөвүлелдиң хуралынга “Айыыл чок болгаш шынарлыг оруктар” деп национал төлевилелдерни түңнээн.
Орук-транспорт сайыды Шораан Чыргал-оол Тываның Баштыңы Владислав Ховалыгга республиканың транспорт инфраструктуразын хөгжүдер адырда кол төлевилелдерни таныштырган.
Сайыттың чугаалап турары-биле алырга, кылдынган ажылдың түңнелинде оруктар шывыгларының шынары болгаш орук шимчээшкини эптиг апарган, салдынган сорулгалар чедип алдынган. Национал төлевилелдиң боттанып турар үезинде ниити узуну 300 километр 136 орук объектизиниң байдалын экижиткен, Кызыл хоорайга чаа светофорларны тургускан.
“Чуртталганың инфраструктуразы” чаа национал төлевилел-биле регионалдыг оруктарның ам-даа элээн каш он-он километрлерин чаартыры көрдүнген.
Салдынган сорулгаларны күүседиринге кол рольду хөй-ниити чөвүлелдери ойнап турар. Хөй-ниитижилер орук септелгезиниң шынарын хынаарынга, орук шимчээшкининиң дүрүмнерин сагыырынга болгаш хүлээникчилерниң эрттирипкен частырыгларын тодарадырынга идепкейлиг киришкен дээрзин Орук-транспорт яамызының Хөй-ниити чөвүлелиниң даргазы Александр Максимов онзалап демдеглээн.
Улуг объектилер инфраструктураларының аразында онза кичээнгейни Кызыл хоорайның төп магистральдарының чаартылгазынче, ооң иштинде Тиилелгениң 70 чылы, Бай-Хаак кудумчуларынче, Вавилин ээтпээниң оруктарынче болгаш Кызыл, Шагаан-Арыг хоорайларже кирер оруктар, Улуг Енисейни кежир көвүрүг дээн ышкаш федералдыг болгаш регионалдыг оруктарда чаа көвүрүглер тудугларынче база республиканың өске-даа кол оруктарынче угландырган.
Тываның Орук-транспорт яамызының медээлеринден.
«Шын» №21 2025 чылдың июнь 5
