Тываның найысылалы Кызыл хоорайның Московская кудумчузу, 123 адресте 136 аал чурттаар 9 каът бажыңны байырлыг байдалга ажыткан.
Ону күрүне корпорациязы – чуртталга-коммунал ажыл-агыйын деткиириниң талазы-биле фондунуң саң-хөө деткимчези-биле эргижиреп-элээн чуртталга оран-савазындан хамаатыларны көжүрериниң талазы-биле республиканың адрестиг программазының, “Чурттаарынга таарышпас оран-саваның санын чүткүлдүг кызырылдазын хандырары” регион төлевилелиниң иштинге туткан.
Бажыңда 136 квартира бар: студиялар – 12, бир өрээлдиг – 70, ийи өрээлдиг – 18, үш өрээлдиг – 36.
69 квартираны эргижиреп-элээн чуртталга оран-савазындан хамаатыларны көжүрериниң талазы-биле программа езугаар дужааган, 15 квартираны өскүс уругларны оран-сава-биле хандырары эргижиреп-элээн чуртталга оран-савазындан хамаатыларны көжүрериниң талазы-биле регионалдыг төлевилел езугаар.
Бистиң чаңгыс чер-чурттугларывыстың аразындан Лидия Лукашевич чаа бажыңче көжүп турарының байырлалын эрттирген. “Тывамедиабөлүктүң” корреспондентизинге ол ынчаар чугаалаан: "Каа-Хем суурда Зеленая, 23-те эргижиреп-элээн чуртталга оран-савазындан бээр көжүп келдивис. Мага хандыр манаанывыс аас-кежиктиг хүнүвүс чедип келгенинге хөлчок өөрүп тур бис. Бистиң өг-бүлевиске эргежок чугула документилер чыгжырынга, бажың-балгатка чединеринге дузалашкан албан-дужаалдыг кижилерге өөрүп четтирип тур бис. Ылаңгыя Тываның Баштыңы Владислав Ховалыгга тускай өөрүп четтиргенивисти илередип тур бис, чүге дизе ооң дорт киржилгезиниң ачызында көжүлде айтырыы шиитпирлеттинген болгай” – деп, херээжен кижи чугаалап турар.
