Кызылдыӊ Правобережная кудумчузунда 800 дөрбелчин метр шөлдүг чаа спорт залын тудуп турар.
"Бизнес-спринт (Спорту шилип тур мен)" чаа федералдыг программага Тываныӊ спорт объектизиниӊ төлевилелин шилээн. Ол программага киржир баштайгы 24 регионнуӊ аразында Тыва база бар болган.
Күш-культура болгаш спорт залын ниити 87 млн. рубль-биле тудуп кылыр. Программаныӊ негелдези-биле аӊаа хуу инвестицияныӊ киирер үлүү ̶ 10 млн ажыг рубль. Оон өске хөреңгизин субсидия кылдыр бээр.Ол дээрге күрүне биле хуу эштежилгениӊ дугуржулгазынга үндезилээн ажыл болур.
Тудугну май айда эгелээн. Хуусаазын мурнады тудугжулар шалыпкын ажылдап турар. Аӊаа мини-футбол, хол бөмбүү, баскетбол-даа ойнап болур. Залдыӊ даштында чарыш, баскетбол, волейбол ойнаар, ГТО нормалары дужаар шөлдер болгаш автомашина тургузар аӊгы чер турар.
«Кадыкшылын, күш-шыдалын дадыктырар күзелдиг улус залга кээп болур. Спорт зал хүннүӊ-не 9.00 шактан 18.00 шакка чедир халас ажылдаар. Төлевирлиг хандырылгалар база турар» – деп, спорт сайыдыныӊ оралакчызы Субудай Оюн чугаалаан.
Найысылалдыӊ оӊ талакы микрорайонунга спорт залды декабрь төнчүзүнде ажыдар деп планнап турган, ынчалза-даа ооӊ бетинде ажылдай бээри чадавас дээрзин республиканыӊ Спорт яамызы дыӊнадып турар.
ТР-ниӊ Чазааныӊ медээзи-биле Р. ДЕМЧИК белеткээн.
