Чуртталга бажың-балгадының тудуу дээн чижектиг улуг хемчээлдиг инвестиция төлевилелдеринге киржирин кордап турар тудуг компанияларынга негелделерниң даңзызын Тываның эрге-чагыргалары калбарткан. Республиканың Чазаа хөй аал чурттаар бажыңнар тудары-биле, садыглажыышкын чокка чер участогун бээриниң чурумун шыңгыыраткан.
Мооң мурнунда тудугжу тала дөрт кол негелдени сагаанда, аукцион чокка чер участогунга кордап болур турган: үндүрүглер талазы-биле өре чок болуру, ак сеткилдиг эвес тудугжуларның даңзызынче кирбейн турары, буруудаарының чадазында келбээни, инвестор болуп шыдаар шинээн бадыткааны. Ынчалзажок эрткен чылдарның дуржулгазындан алырга, чижеглей алган негелделер ажылдар күүселдезиниң хуусааларын чылзыр азы тудугну кылбайн баар чоруктардан, бот-үне өстүрүлгезинден, багай шынардан, а оон туржук керээлиг организацияның дезип-ырбаашкынындан камгалавайн турган.
Мооң ужун юристер Тываның Баштыңы Владислав Ховалыгның даалгазы-биле тудугжуга салдынып турар негелделерни калбарткан. Аңаа дүүштүр 2-ден эвээш эвес күүсеттинген төлевилелдерлиг, чок-ла болза стажы 3 чылдан хөй, а ол ышкаш 3 муң дөрбелчин метрден эвээш эвес чуртталга оран-савазын ажыглалга киирген тудугжу инвестор болуп болур.
Бөгүн Тывада элээн каш комплекстер туттунуп турар. Кызылда туттунуп турар “Мөңгүн” комплекизинче ниити шөлү 150 муң дөрбелчин метр 38 хөй аал чурттаар бажың-балгаттың тудуу кирип турар.
/ А. ХЕРТЕК белеткээн.
"Шын" №46 2023 чылдың июнь 24
