Декабрь 7-де Чадаананың төп ном саңынга Россияның Маадырлар хүнүнге тураскаадып солун, онзагай ужуражылганы эрттирген.
Ужуражылгага номчукчулар болгаш Чадаананың дугаары 1, 2 ортумак школаларының өөреникчилери, Тываның технологтуг техникумунуң сургуулдары база чалаттырган аалчылар, Чөөн-Хемчик кожууннуң Культура сайзырал төвүнүң культура массалыг хемчеглер талазы-биле специализи Айдың Монгуш, Культура сайзырал төвүнүң специализи Ангелина Монгуш, «Чаа орук» солуннуң кол редактору Вячеслав Монгуш киришкеннер.
Ужуражылганы ном саңының чурт-шинчилел салбырының эргелекчизи Эльвира Кара-Сал башкарып эрттирген.
Хемчегниң кол маадыры, Чадаана хоорайның кезер эмчизи, тускай шериг операциязының киржикчизи Артыш Сат болган. Артыш Хирлиг- оолович ужуражылга үезинде бодун келген чонга таныштырып, ада-чуртун, арат-чонун камгалажып, уйгу-дыжын, амы-тынын харамнанмайн, неонацизмге удур тулчуп, кезер эмчиниң хүлээлгезин маадырлыы-биле күүседип, балыгланган дайынчыларга бодунуң дузазын кадып, камгалап чораанын аалчыларга таныштырган. Хары черге ажылдаарга, эмчилерге өөрүнчүг-даа, муңгаранчыг-даа, дүвүренчиг-даа, коргунчуг-даа турганын келгеннерге чугаалады. Ол улуг идегел-биле бистиң чуртувуста болуп турар тускайлаттынган шериг операциязынга тиилеп алырын бүзүрелдии-биле чүрээниң ханызындан чугаалады, олурганнар ооң-биле чөпшээрежип турганнар. Солун ужуражылгага немештир ном саңының ажылдакчылары номнар делгелгезин кылып, база «Вера Байлак Улуг дайынның бичии дайынчызы», «Тыва Ада-чурт дайынының үезинде» деп таныштырылгаларны тайылбырлап көргүскеннер. Хемчеглерниң төнчүзүнде ном саңының директору Ирина Скорых дайынчы эмчи Артыш Хирлиг-ооловичиге четтиргенин илередип, өөрүп четтириишкинниң бижиин сунуп, аас-кежикти, быжыг кадыкшылды күзээн.
Азияна МОНГУШ,
Чөөн-Хемчик кожууннуң төпчүткен библиотека системазының библиогравы
«Шын» №97 2023 чылдың декабрь 20
