Тывада «Көдээ черниң почтальону» Бүгү-россия чергелиг мөөрейниң регионалдыг чадазының түңнелдери чарлаттынган. Бо төлевилелди «Чаңгыс демниг Россия» партия, Россия почтазы, Россияның Сан-чурагайлыг хөгжүлде болгаш Россияның Көдээ ажыл-агый яамылары кады эрттирип турар. Көдээ черлерде почта ажылдакчыларының күш-ажылын онзалап демдеглээри-биле 2025 чылда мөөрейни эгелээн.
Каа-Хем кожууннуң Бүрен-Хем суурдан Ноябрина Допчун-оол бо чылын бодунуң ажыл-херээнде эң-не тергиин мергежилдиг деп үнелелди алган. Бүгү республикадан 20 шыырак удурланыкчыларын ашкаш, май 26-да Москвага болур финалга Тываның адын камгалап киржир эргени чаалап алган.
Ноябрина Допчун-оол бо адырда беш чыл ажылдап турар. Ол чүгле төрээн Бүрен-Хемниң чурттакчыларын эвес, кожа-хелбээ Кундустуг суурда муң ажыг кижини, чүс хире өрегени харыылап турар. Көдээ суурларга ажылдаары дүрген шимчээшкинни негеп турар болганындан, Ноябрина мопед мунуп өөренип алган. Өөнүң ээзи беш ажы-төлдүг иеге чагааларны, солуннарны, пенсияларны дүрген тарадып чедирзин дээш, хөлгени садып берген.
«Суурга-ла төрүттүнүп, өскен болгаш, төрээн черимни төлээлээри меңээ улуг алдар-дыр. Почтальон болуру чүгле ажыл эвес, а чаңгыс чер чурттугларымга дузалажыр арга-дыр. Суурнуң почтазы дээрге дыка хөй кижилерге делегей-биле харылзаа болгаш амыдыралының чугула кезээ-дир» — деп, Ноябрина чугаалаар.
Ноябрина «Улусчу почтальон» деп тускай номинацияга тиилээр бодалдыг. А Тываның чурттакчылары ону ырактан деткип, бадылап болур. «ВКонтакте» социал четкиде Россияның Почтазының албан езузунуң арынынга бадылаашкын май 25-ке чедир болур.