Одалга төвүнүң күчүзү Хову-Аксы суурда чаагайжыды туттунган бажыңнарны эки чылыдарынга чедишпес дугайында айтырыгларны 2022–2023 чылдарның кышкы одалга сезонунда Тываның Чазаа-биле декабрь айда дарый шиитпирлээн дугайында сагындыраалы.
Чылыг бээриниң күчүзүн улгаттырары-биле, 1 дугаар суугунуң капитал септелгезин кылып, 2 дугаар 6,5 гигакалорийлиг чаа улуг суугуну немей тургускан түңнелинде, одалга сезонун чогуур деңнелге эрткен дээрзин Хову-Аксының Чылыг электри төвүнүң удуртукчузу Шолбан Тюлюш дыңнаткан.
Ол ышкаш ооң чугаалап турары-биле, одалга төвүнүң амгы күчүзү Хову-Аксы суурда чаагайжыды туттунган чуртталга бажыңнарын болгаш социал адырның албан черлериниң бажың-балгадын чылыдарынга четчип турар. Суурнуң кыдыында ийи кудумчуда чаа туттунган бажыңнарны база суурнуң бажыңнарын чылыг-биле бүрүн хандырар сорулгалыг 3 дугаар суугунуң капитал септелгезин чорудуп, ооң күчүзүн база 6,5 Гка улгаттырар ажылды чайгы үеде чорудары көрдүнген.
2021–2022 чылдарның одалга сезонунда 7–8 муң тонна хөмүрнү одап турган болза, бо кыжын 10–11 муң тонна хөмүр-биле соок кышты хүр эрткен.
Хову-Аксының Чылыг электри төвүнүң коллективинде ниитизи-биле 65 кижи ажылдап турар. Оларның аразында 9 кижи инженер-техника специализи, 4 аңгы сменада 10 ажылдакчы ээлчег ёзугаар ажылдап турар. 2023–2024 чылдың одалга сезонун онча-менди эртип алыры-биле чайын шанааң белетке дээри ышкаш чайгы үеде баш удур белеткел, септелге ажылдарын одалга төвүнүң коллективи амдан эгелеп чорудуп эгелей берген. 3 дугаар суугунуң септелге ажылын чоокку үеде доозары планда көрдүнген. Хову-Аксының одалга сезону майның 31-ге чедир уламчылаар.
/ Алиса ДОНГАК.
Буян ООРЖАКТЫҢ тырттырган чуруктары.
"Шын" №36 2023 чылдың май 20
