Одалга сезонунуң айтырыгларын боттарының хууда контролюнга тударын сайыттардан болгаш кожууннарның чагырыкчыларындан Тываның Баштыңы негээн.
Кышкы одалга сезонунуң үезинде ажылга белениниң паспорттарын республиканың социал адырының элээн каш объектилери албаан. Чижээлээрге, кадык камгалалының 3 культура албан чериниң дөрт организациязы документилерни октябрь 10-га чедир албаан.
Ол объектилер харыысалгазында турар албан черлериниң удуртукчуларын Тываның Баштыңы Владислав Ховалыг кончуг чидии-биле шүгүмчүлээш, кышкы одалга сезонунга белениниң чөпшээрелин алыр талазы-биле ажылды боттарының хууда хыналдазынга алырын олардан негээн.
Кадык камгалал сайыды Анатолий Югайның сөстери-биле алырга, медицинаның 3 албан чериниң кышкы одалга сезонунга белениниң чөпшээрелин албайн барган чылдагааны Бай-Тайга, Чаа-Хөл болгаш Бии-Хем кожууннарның төп эмнелгелериниң септелгезиниң узамдыкканы – ол объектилерде эргилээн одалга системаларын бүрүнү-биле чаарты солуп турары. Капитал септелгени чорудуп турар организациялар одалга системаларының септелгезин октябрь 20-ге чедир доозарын хүлээнип алганын Анатолий Югай дыңнаткан.
Культура албан черлериниң кышкы одалга сезонунга белениниң чөпшээрелин алырының хуусаазы элээн орайтаар. Культура болгаш туризм сайыдының бирги оралакчызының албан-хүлээлгезин күүседип турар Сайдана Хертектиң дыңнатканы-биле алырга, Чөөн-Хемчик кожууннуң Чыраа-Бажы суурда Культура бажыңының одалга системазының капитал септелгези ноябрь 30-ге чедир уламчылаар. Өвүр кожуунда Саглы суурда көдээ клубтуң одалга чериниң тудуг-септелге ажылдарын ноябрь 1-ге чедир чорудар. Мөңгүн-Тайга кожууннуң Кызыл-Хая суурда бичии уругларның уран чүүл школазының одалга системазының капитал септелгези октябрь 25-ке чедир узамдыгар. Барыын-Хемчик кожууннуң Кызыл-Мажалык суурунуң библиотеказының одалга чериниң эрги суугузун солуп, чаа суугуну октябрь 13-ке чедир тургузуптарын септелге ажылдарын чорудуп турар организация хүлээнип алган.
Владислав Ховалыгның бодалы-биле алырга, септелге ажылдарының узамдыккан кол чылдагааны медицина болгаш культура албан черлериниң удуртукчулары септелге ажылдарын шыңгыызы-биле хынавайн турганы. Септелге ажылдарын хүлээнип алган тудуг-септелге организациялары септелге ажылдарын чорударының хуусааларын хажыдарга-ла, чогуур органнарга дыңнадып, чардынган керээлерни соксадырынга чедир хемчеглерни ап чорудар ужурлуг турган. Тудуг-септелге организациялары күрүне чагыгларын чогуур хуусааларда чорудуп турарын тус чер эрге-чагырга органнары база контрольдаар ужурлуг. Оларның эрге-чагыргазында девискээрде болуп турар чүүлдер дээш харыысалгалыг муниципалдыг тургузугларның удуртукчулары күрүне керээлериниң күүсеттинмээни, эң ылаңгыя социал объектилерниң кышка белеткелинде чедир кылдынмаан ажылдар дээш шыңгыы хемчеглерни кышкы одалга сезонунга белеткел база харыысалгалыг удуртукчулары-биле деңге үлежир ужурлуг.
Кышкы одалга сезонунга белеткелде чедир кылдынмаан чүүлдерни кожууннарның муниципалдыг эрге-чагыргаларының баштыңнары хыналдага алгаш, шиитпирлеттинмээн айтырыглар бар объектилерге хүннүң чедип, ажылдың канчаар чоруп турарын, ол ажылдар дээш харыысалгалыг албан черлериниң удуртулгазынга тодаргайы-биле дыңнаткан турарын Владислав Ховалыг негээн.
Ш. МОНГУШ.