Бо чылдың октябрь 21-де Москвада медицинаның дээди өөредилге черлериниң сургуулдарының, ординатор, аспирант эмчилериниң ассоциациязының онгу юбилейлиг хуралы байырлыг байдалга эрткен.
Юбилейлиг хуралга ук ассоциацияның он чыл иштинде кылып чоруткан ажылын база эртем-шинчилел талазы-биле илеткелдерни чыылганнар дыңнаан. Аңаа РФ-тиң Күрүне Думазының депутады Айдың Сарыглар, Тыва Республиканың Медицина палатазының даргазы, Республиканың 2 дугаар эмнелгезиниң кол эмчизи Анджела Канчыр-оол, Москвада Тываның төлээ чериниң төлээзи Урана Иванова олар киришкен.
Ассоциацияны 2013 чылдың сентябрь 28-тен тура медицина эртемнериниң доктору, профессор, Тыва Республиканың улустуң эмчизи Вячеслав Сүдер-оолович Ондар үндезилеп тургускаш, ооң ажылын билдилиг башкарганын айтыры чугула.
Бо организацияның кол сорулгазы – Москвада медицинаның дээди өөредилге черлери-биле харылзаа тудуп, ында өөренип турар студентилерге, ординаторларга, аспирантыларга боттуг дуза чедирип, эртем ажылы-биле өөредилгезин капсырлаштырган сургуулдар дооскужеге оларны деткиири.
Ассоциацияның даргазы Байыр Домбаанай он чыл иштинде кылдынган ажылдарны допчу, тода илеткээн. Кол-кол кылдынган ажылдар мындыг: «Шу-де ДЕНТ» деп төлевилел ёзугаар Москвада чурттап турар 89 чаңгыс чер чурттугларының диштерин Н.И. Пирогов аттыг эмчи университединиң студентилери, ординаторлары халаска эмнээн.
Халаска эмнеттиргеннер аразында автор мен база барын айтып каайн. Тывада травматологияның үндезилекчилериниң бирээзи, Тыва АССР-ниң алдарлыг эмчизи, травматолог Виктор Александрович Верещагинниң чырык адынга эртем-практиктиг конференцияны эрттиргени төөгүде уттундурбас, келир үениң эмчилеринге өөредиглиг болуп арткан. Ол ышкаш ассоциация Тыва Республиканың социал-экономиктиг хөгжүлдезинче угланган эртем төлевилелдериниң мөөрейин чарлаан. Мөөрейниң тиилекчилерин бирги чергениң диплому – 50 муң рубль, ийиги чергениң – 30 муң рубль, үшкү чергениң – 20 муң акша-биле шаңнаары көрдүнген.
Амгы ниитилелдиң хамаатызы, ылаңгыя эмчи кижи бүгү талазы-биле сайзыраңгай болур ужурлуг. Кадык болур дизе, спорт-биле өңнүктежир. Бо талазы-биле Москвада «Тыва чуртташтар» ниитилелиниң Президентизи Вячеслав Сүдер-оолович Ондарның шаңналынга пляжка хол бөмбүүнүң маргылдаазын эрттиргени киржикчи бүрүзүнүң хей-аъдын көдүрген.
Бо бүгүнү Байыр Домбаанай илеткээн соонда, Сеченов аттыг Эмчи университединиң бешки курсчузу Очур Салчактың «Сеченов аттыг университетте өөредилге, ажыл-амыдырал» база анестезиолог-реаниматолог Саяна Серен-оолдуң «Тыва Республикада элээди ажы-төлдүң хан базыышкыны улгаттырар психосоциал факторлар» деп темаларга эртем-шинчилел талазы-биле илеткелдерин хуралдың киржикчилери сонуургап дыңнаан.
Хурал адакталганда, меңээ сөс бээрге, Томскунуң Эмчи институдунга өөренип тургаш, анатомия эртемин дужаары эң бергезин шүлүктеп, эмчи эртемни чедип алгаш, Мөңгүн-Тайга, Чаа-Хөл кожууннарга чаштар эмнеп, ЛОР эмчизи турганымны, амыдыралымга болган таварылгаларны чугаалап, эмчи болуру буянныг болурундан аңгыда, кончуг харыысалгалыг берге мергежил дээрзин угааткаш, өөренип дооскаш, төрээн Тывавыска ажылдаарын студентилерге сеткилимниң ханызындан күзедим. Хурал хөөмей-сыгыттыг байыр чедириишкини, шайлаашкын база чурукка тырттырыышкын-биле доозулган.
Зоя ДОНГАК,
эмчи, РСФСР-ниң кадык камгалалының тергиини, Тываның база Россияның чогаалчылар, Журналистер эвилелдериниң кежигүнү.
“Шын” №81 2023 чылдың октябрь 25
