Хат-шуурган, үер-чайык, өрт-халап дээн ышкаш онза байдалдар үезинде когараан хамаатылар Госуслуги порталын таварыштыр билдириишкинни кииргеш, акша-төгерик дузаламчызын ап болур. Россияның Онза байдалдар яамызы Россияның Чурагайлыг хөгжүлде яамызы-биле кады Госуслуги порталында «Онза байдалдарда күрүне деткимчези» деп арынны ажылдап кылган.
Ук адырга хат-шуурган, чаъс-чайык, чер шимчээшкини дээн ышкаш бойдустуң чайгаар болур болуушкуннарындан болгаш өрт, частыышкын, орук озал-ондаа дээн ышкаш кижиниң азы технологияларның киржилгези-биле болган болуушкуннарга когараан хамаатылар Госуслугиде чаа ажыттынган арындан материалдыг дуза алырының дугайында дилег-билдириишкинни киирип болур апарган.
Кымнар кандыг байдалда күрүнениң материалдыг дузаламчызын ап болурул?
Эргежок чугула хереглелдиң эт-хөреңгизин чидиргенде; амыдыралы берге байдалда; кадыынга хоралыг кемдээшкин алганда; өг-бүлезиниң бир кежигүнү айыылга таварышкаш, мөчээнде.
Билдириишкин бижиирде, бир болза, Госуслуги таварыштыр боду киирип болур, бир болза, чурттап турар чериниң девискээринде хөй функциялыг төпке чеде берип болур. Оон аңгыда, тус черлерде чагырга черлеринге баар арга база бар.
А. ОНДАР белеткээн.
“Шын” №91 2023 чылдың ноябрь 29