Бойдус халавындан Тываның чамдык кожууннарында оперативтиг байдал нарыыдап турар. Сүт-Хөл кожууннуң Ишкин сумузунда суггур чаъстаашкындан Хөр-Тайга дагның бажындан суг баткан. Суурнуң дөрт хире кудумчузунуң чурттакчылары когаралга таварышкан. Бай-Тайга кожуунда Тээли суурнуң чанында Хемчик хем кежилдир көвүрүгнү үер үрей шапкан. Чаа-Хөл болгаш Улуг-Хем кожууннарга чаъстыг долу чагганы-биле электри шугумунга үзүктелиишкинни тургускан.
Тываның Баштыңы Владислав Ховалыгның чугаазы-биле, амгы үеде Тываның Чазаанда онза байдалдар талазы-биле комиссия регионда оперативтиг байдалды контрольга алган.
Сүт-Хөл кожууннуң Ишкин сумузунда штабты чазак даргазының оралакчызы Алик Монгуш удуртуп турар. Оларның бирги сорулгазы – чурттакчы чонга дуза кадары, эргежок чугула актыларны база документилерни тургузары болгаш когаралдың өртээн доктаадыры.
«Кайгамчык чараш черде турар, чедери берге суурга мындыг болуушкуннар хенертен болгулай бээри харааданчыг. Суурну камгалаары-биле А.К. Монгушка болгаш бөлүк специалистерге сугдан чайладыр буга каналдарын тургузар бүгү ажылды чорударын даастым. Төлевилел
-смета документациязын кылыптарга-ла, федералдыг программаларның киржилгези-биле акшаландырыышкынны чедип алыр бис» - деп, В. Ховалыг бодунуң ТГ-каналынга бижээн.
Ол ышкаш Ишкин суурже кирер орук база үрелген. Орук техниказы ынаар үнүпкен деп, Тываның Баштыңы дыңнаткан.
«Чөөн-Хемчик кожууннуң Бажың-Алаак биле Ийме суурларже баар орук участоктарын катап тургузар ажылдар чоруп турар. Ол база суггур чаъстың уржуктары-дыр» - деп, ол бижээн.
Бай-Тайга кожуунда ам чаңгыс талаже эртер орукту организастаан. Чоокку үеде орук ажылдакчылары орукту аштап-арыглаар, септээр ажылдарны чорудар. Ол ажылдарны кылыр техника орукта бар чыдар, ол ышкаш дежурствону база организастаан. ТР-ниң Орук транспорт яамызының медеглээни-биле, Хандагайты – Ак-Чыраа уунче Торгалыг хемни кежир көвүрүг аксын катап тургускан.
Чаа-Хөл биле Улуг-Хем кожууннарда электри шугумун катап тургузар ажылдарны специалистер чорудуп эгелээн.
«Чуртташтарым, болган байдал ужун оруктарга оваарымчалыг болуңар. Эргежок чугула эвес болза, узун орук чорбаңар, ылаңгыя дүне. Тус черлерниң удуртукчуларынга байдалды хайгааралга ап, чурттакчылары-биле харылзааны тударын база катап сагындырайн» - деп, В. Ховалыг бижээн.
