Суггур чаъстар соонда, хемнерниӊ суу тереӊнээн. Республиканыӊ барыын талазында «Абакан – Ак-Довурак», «Чадаана – Ак-Довурак», «Чадаана – Ийме», Кара-Хөл суурже баар автомобиль оруктарыныӊ кезек участоктары үрелген.
Амгы үеде оруктарны септеп кылып турарын Орук-транспорт яамызы дыӊнадып турар. Дарый септеп турар орук ажылдары – регионнуӊ Баштыӊы Владислав Ховалыг хыналдазында.
Үстүнде айыттынган суурлар-биле аргыжарда, ында оруктуӊ үрелген участоктарын оюп эртер черлер бар. «Абакан – Ак-Довурак» деп автомобиль оруундан түр үеде кылып каан чазаглыг орукту септээр дээш, орукчулар сугнуӊ сыыгаарын манап турар. Хакас Республика болгаш Красноярск край-биле аргыжар «Абакан – Ак-Довурак» трассазыныӊ Ак хемни кежер көвүрүгнүӊ чартыы, ол көвүрүгже эртер чер июнь эгезинде шапкын агымныг хем суундан үрелген.
Регионнуӊ Чазаа үрелген оруктарныӊ байдалын хондур хынап турар. Барын-Хемчик, Бай-Тайга болгаш Чөөн-Хемчик кожууннарныӊ удуртукчулары орук албан черлеринге дузалажып, чурттакчыларга болур-чогуур медээлерни дыӊнадып турар. Суурларныӊ чурттакчыларынга ырак-узак чер барбазын сүмелээн.
Септеп кылыр оруктарныӊ байдалын өөренип көргеш, Орук-транспорт яамызы ажылчыннарныӊ болгаш тускай техниканыӊ санын көвүдеткен. Июль 23-тен тура оруктуӊ үрелген участоктарын 16 тускай техника-биле септеп кылып турар.
Республиканыӊ чурттакчылары орукту кылып турар дээрзин эп-чөп-биле билип көөрүн, оруктарга оваарымчалыг болурунче Владислав Ховалыг кыйгырган.
ТР-ниӊ Чазааныӊ медээлеринден Р.Демчик белеткээн.