Озал-ондакка таварышкаш, эмчиже кирген школачыларның ийизин үндүр бижээн.

Эрткен пятницада озал-ондактың хайы-биле эмчиже кирген школачыларның кадыының байдалы экижип турар. Ийи ѳѳреникчиниң кадыының байдалы экижип, катап хыналданы эрткениниң түңнелинде, оларны дүүн республиканың № 1 эмнелгезинден үндүр бижээн. Бѳгүн база дѳрт школачыны үндүр бижиирин планнап турар болгаш бир ѳѳреникчи амдыызында чедир эмнедип турар. Эмнедип турар уругларга ужурашкан кадык камгалал сайыды Анатолий Югайның чугаазы-биле аас-кежик болуп, уругларның кадыынга айыылдыг байдал тургустунмаан.

Болган озал-ондак соонда 18 кижини, тодаргайлаарга,16 назы четпээн уругларга, 2 улуг кижиге эмчиниң дүрген дузазын чедирип, эмнелгеге чыттырган турганын сагындырып каалыңар. Эмчи шинчилгезиниң соонда, тос уругну амбулаторлуг эмнээшкинге, аңгы-аңгы кемдээшкин алган чеди уругну база башкызын республиканың № 1 эмнелгезинге эмнээри-биле чыттырган турган. Когарааннарга оперативтиг дүрген дуза негеттинмээн болгаш олар шупту эмнээшкинни эртип турар. Башкы боду эмчилерниң хайгааралында артып турар.

Тываның ѳѳредилге сайыдының хүлээлгезин күүседип турар Елена Хардикованың дыңнатканы-биле уруглар бо чылын ОГЭ дужаар, ынчангаш оларның шылгалдага кичээнгейлиг белеткелин, сагыш-сеткилиниң байдалын эки ѳѳренип кѳѳрү чугула негеттинип турарын Бажың-Алаак школазының башкыларынга дааскан.

#ТываныңЧазаа #Тыва #Өөредилгеяамызы #Тыва #Шынсолун #Тывадыл