55-ки мото-адыгжы (даг) бригаданың девискээринге студентилер аразынга шериг-спортчу «Патриот» оюнну эрттирген. Аңаа республикадан студентилерниң 10 командазы киришкен. Шеригжиткен оюнну «Билиг. Маадырлар» деп чырыдыышкын акциязының иштинге Башкының болгаш дагдыныкчының чылынга тураскаадып эрттирген.
Киржикчилер 5 чаданы эрткен: «Чыскаалга белеткел», «АК-74-тү долу эвес чазары болгаш чыыры», «Мергежилдиг сапер», «4 тускай сорулгалыг марш-бросок», «Тускай тактикалыг оюннар (пейнтбол)».
Түңнелинде, Тываның күрүне университединиң студентилери тергиидээн. Ийиги черни Кызылдың башкы колледжиниң командазы алган. Үшкүзүнге Тываның көдээ ажыл-агый техникумунуң сургуулдары төлептиг болган. Тиилекчилерге акша сертификаттарын тывыскан. Ол ышкаш «Марш-бросокту эң-не тергиин эрткен», «Тергиин сапер», «Тергиин адыгжы» деп номинацияларның тиилекчилерин база шаңнаан.
Шериг-спортчу «Патриот» оюнну ТывКУ-нуң Харылзаштырылга төвү ТР-ниң Өөредилге яамызы, ТР-ниң Аныяктар херектериниң талазы-биле агентилели база 55-ки мото-адыгжы (даг) бригада-биле катай организастап эрттирген.
/ ТывКУ-нуң парлалга албанының медээзинден.
"Шын" №45 2023 чылдың июнь 21
