Чаа өөредилге чылының бүдүүзүнде республиканың башкыларының август чөвүлел хуралынга Тываның Баштыңы Владислав Ховалыг киришкеш, ажыл-ижи үлегерлиг, төлептиг башкыларга күрүне шаңналдарын тывыскан.
«Тываның өөредилге адырының өзүп олурар салгалдарны өөредир болгаш кижизидер ажылының чедиишкиннерин демдеглээри чугула. Эрткен өөредилге чылының түңнелдери-биле алырга, 83 медалистиг болган бис. Ол эрткен чылын шылгалдаларны чүс баллга дужааган уругларның санын ийи катап ажып турар. Доозукчуларның билииниң шынарының бедип турары бистиң башкыларывыстың шудуругу ажылы-биле дорт харылзаалыг. Тергиин эки ажылдыг башкыларга бөгүн күрүне шаңналдарын тыпсып турдувус. Назы-хары улгады-даа берген болза, ам-даа уруг-дарыгны өөредип, башкылап чоруур хоочуннарывысты онзалап демдеглээр ужурлуг. Уругларны өөредиринден аңгыда, келир үениң башкыларынга арга-дуржулгазын дамчыдып бээр улуг харыысалга – оларда. Амгы үеде чугула сорулгаларның бирээзи – хоорай уругларындан чүзү-даа дудак чок болзун дээш, кожууннарда өөредилгениң шынарын экижидери» - деп, Владислав Ховалыг социал четкиде блогунга бижээн. Удавас республикага немежип келир чаа школаларны, аныяк башкы кадрларны тускай сорулгалыг белеткээрин, башкы мергежилдиң ат-алдарын бедидер хемчеглерни тодаргай айыткаш, «Башкы мен», «Көдээ черниң башкызы» деп төлевилелдерни Тывага ам-даа уламчылаар дээрзин дыңнаткан.
«Уругларны школага өөредиринден аңгыда, ниитизи-биле оларның патриотчу кижизидилгезинче кичээнгей салыр деп федералдыг төптүң шиитпирин деткип турар мен. Бо ажыл-хүлээлгени база школа кылыр ужурлуг. Сентябрь 1-ден тура школа директорларының кижизидилге талазы-биле 118 сүмелекчилери ажылдап эгелээр. Оларның кол сорулгазы – элээди назылыг оолдарны, уругларны шын социал угланыышкынче углап-баштап, оларның сагыш-сеткилинге шын мөзү-шынарлыг билиишкиннерни угаадып билиндирери, кижизидери. Бистиң республикавыска ол дээрге кол айтырыг-дыр. Уругларны канчаар өөредип-кижизиткен бис - Тываның келир үези ындыг болур» - деп, Тываның Баштыңы Владислав Ховалыг бижээн.
Р.Демчик белеткээн.