Тываның Баштыңы Владислав Ховалыг православ чоннуң бир кол байырлалы - Рождество таварыштыр республиканың чурттакчы чонунга байырын чедирген.
“Хүндүлүг, чаңгыс чер чурттугларым! Силерге сеткилимниң ханызындан Рождество байырлалын таварыштыр байырым чедирип тур мен. Бо чырыткылыг байырлал өндүр улуг Россиявыстың культуразының болгаш шажын-чүдүлгезиниң хөй янзылыын кезээде бадыткап турар. Бөгүн православ дуганнарда болгаш хүрээ-хииттерде байырлалдың мөргүл номчулгалары болуп турар. Рождество, чыл эгези, ол кезээде эки чүүлдерже идегел-биле улуг харылзаалыг. Сеткилимниң ханызындан шупту күзелдериңер бүдерин күзеп тур мен. Тайбыңны, быжыг кадыкшылды болгаш аас-кежикти сөңнээр-ле болзунам!» - деп, Тываның Баштыңы бодунуң телеграмм каналда арнынга бижээн.
Рождество байырлалын таварыштыр шупту мөргүлдер Тываның аңгы-аңгы православ хүрээ-хииттеринге болур. Рождестовну байырлаары дээрге-ле, республиканың чурттакчыларының аразынга демниг чорукту болгаш шажын-чүдүлгениң үнелиг чүүлдерин быжыглаар кол ёзу-чаңчылы болур.
Чуруктарны интернет четкиден алган.
