Өөредилгениң школа системазын эде чаартыр федералдыг программа шугуму-биле бо чылын Тывага 13 школаның капитал септелгези уламчылап турар. Күрүне керээзи ёзугаар ажылдарны апрельдиң 1-ден эгелээш, октябрьның 15-ке чедир доозар. Школаларның капиталдыг септелге чорудуу – Тываның Баштыңы Владислав Ховалыгның онза кичээнгейинде.
Каа-Хем кожууннуң Бүрен-Аксы суурнуң болгаш Өвүр кожууннуң Ак-Чыраа школаларының капиталдыг септелге ажылдары айыткан хуусаазын эртежик дооскан. Септеттинген школаларда амгы үениң негелдезинге дүүштүр иштики, даштыкы хевирин болгаш одалга системазын чаартып, изиг-соок сугну, арыгланыр өрээлдерни киирип, өрт айыылын баш удур медеглээр сигнализацияны, видеохайгааралды ажылдадып тургускан. Чаа өөредилге дериг-херексели болгаш эт-сеп-биле чүмнээр ажылдар арткан.
ТР-ниң өөредилге сайыды Елена Хардикова кожууннарда школаларның капитал септелге ажылдарының ажыл-чорудуун доктаамал хынап турар. Ол чоокта чаа Тес-Хем кожууннуң О-Шынаа школазының септелгезиниң ажылы-биле таныжып четкен. Бир дугаарында, кожуун чагырыкчызы Олег Чангы-оол болгаш өөредилге эргелелиниң даргазы Елена Эртине-биле ажылчын байдалга кожууннуң өөредилге шугумунуң инфраструктуразын чаартыр дугайында дугурушкан.
2022–2023 чылдарда кожуунда 8 школаның 2-зи “Өөредилгениң школа системазын эде чаартыр” деп федералдыг программа ёзугаар капитал септелге чорудар школаларның аразынче кирген. 2022 чылда Самагалдайның 2 дугаар школазын бүрүнү-биле чаартып септээн болза, 2023 чылда О-Шынаа школазының септелгези эгелээн. 2026 чылга чедир программаларга киржиринге Чыргалаңды школазының септелгезиниң документ-саавыр ажылы белен. Ук школа 2024 чылда федералдыг программаже кирген. Россияның Чырыдыышкын яамызының чөпшээрелин манап турар.
О-Шынаа школазының капитал септелгезинге 30,3 млн рубль көрдүнген. Септелге ажылдарын “СКАТ” КХН хүлээнген. Ук организация эрткен чылын Чаа-Хөл школазының септелгезин айыткан хуусаа ёзугаар дооскан. Амгы үеде О-Шынаа школазының септелгези 45 хуу кылдынган дээрзин өөредилге сайыды дыңнаткан. Иштики, даштыкы септелге ажылдары уламчылап турар. Тудуг материалдары бүрүнү-биле объектиде белен. Елена Хардикова смета талазы-биле документиге хамаарыштыр шыңгыы сагындырыгларны берген:
– Материалдар чарыгдалының талазы-биле элээн карышкактар бар. Кожуун чагыргазы ук ажылдарны долузу-биле дузалажыр ужурлуг. Проект-смета талазы-биле документизин шын эвес тургусканының түңнелинде, сметада киирбейн барган материалдарже немей чарыгдалдар үндүреринге таваржып турар бис – деп, Елена Хардикова социал четкиде хууда арынында бижээн.
Кожуун чагырыкчызы Олег Чаңгы-оолга школаның септелге ажылдарын онза кичээнгейге тудуп, документ-саавырны хынамчалыг ажылдаарын сайыт сүмелээн. Кожуунга ам-даа 4 школаны федералдыг программа деткимчези-биле септээр дээрзин ол дыңнаткан.
Алиса ДОНГАК.
Чуруктарны Өөредилге яамызының социал четкиде арынындан алган.
