Республикада сөөлгү неделяда чидиг респираторлуг аарыглардан аараан 1031 таварылга бүрүткеттинген. Ооң мурнунда неделяга деңнээрге, 69,6 хуу көвүдээн. Грипптен аараан 71 таварылга тодараттынган. Ол дээрге 14,2 катап көвүдей берген. Неделя дургузунда 137 аарыг кижини эмнелгеге чыттырган. Оларның 105-и 14 харга чедир уруглар.
Найысылал Кызылда грипп болгаш чидиг респираторлуг аарыглардан аараан 401 таварылга бүрүткеттинген, 54 бичии, 17 улуг кижини эмнелгеге чыттырган.
Эпидемиологтуг сезоннуң эгезинден тура 17269 лабораторлуг шинчилелдерни, 1613 анализти алган түңнелинде, ээлчеглиг грипп, чидиг респираторлуг аарыглардан аденовирус, бокавирус, риновирус, метапневмовирус, парагрипп, пневмонияның микоплазмазы, ээлчеглиг коронавирус, Covid-19 илереттинген.
Чаа коронавирус халдавыры эвээжээни демдеглеттинген. Беш хонук дургузунда 10 таварылга бүрүткеттинген. Ол дээрге ооң мурнунда неделяга деңнээрге, 60 хуу эвээжээн.
Респираторлуг аарыгларның нептерээрин эвээжедир деп бодаар болза, холдарны үргүлчү чуур, эптиг байдал чок болза, кешке ажыглаар антисептиктерни ажыглаар. Чүгле чаңгыс ажыглаар думчук аржыылынче азы дыгдындыр туткан шенээнче аспырар. Аарыг нептереп турар үеде хөй улус чыылган черлер баарда, камгалал маскаларны кедер, гаджеттерни аштап чодар.
Чурттап азы ажылдап турар оран-саваны агаарладыры, аштап-чууру, эртенги үеде аарыг улусту илередири база чугула рольду ойнап турар. Респираторлуг аарыглар демдектери бар улусту эрттирери хоруглуг!
Бистиң корр.
«Шын» №6 2024 чылдың январь 27