Росхереглелхайгааралдың Тыва Республикада эргелели эрткен неделя дургузунда, ноябрь 27-ден декабрь 3-ке чедир, чаа коронавирус халдавырындан аараан 79 таварылга бүрүткеттингенин дыңнаткан. Кызыл, Ак-Довурак хоорайларның, Улуг-Хем, Барыын-Хемчик, Кызыл, Тожу, Каа-Хем, Тес-Хем база Бии-Хем кожууннарның чурттакчылары ук аарыгдан аарып турары демдеглеттинген.
COVID-19-тан аарааннарның 49-у улуг кижилер, а 30-и — 17 харга чедир бичии уруглар. Халдавырлыг аарыглар эмнелгезинде 30 аарыг кижи чыдар, 28 кижиниң байдалы ортумак, 2 кижиниң аар, 1 кижи — ИВЛ аппаратта коштунган, 49 кижи амбулаторлуг эмнээшкинде.
Хостуг оруннар саны четчир, ындыг болзажок эпидемиолог эмчилер санитарлыг камгалал хемчеглерин күштелдирерин сагындырган. Бирги ээлчегде коронавируска удур тарылганы салдырар, арыг-силиг алдынар, хөй улус чыылган черлер барбас, социал ырак хемчээлди сагыыр, амыдыралдың кадык овур-хевирин эдерер.
«Шын» №93 2023 чылдың декабрь 6