Чүлдүм кудумчузунда чаа терапия корпузу ажыглалче кирген соонда, республиканың 1 дугаар эмнелгезиниң терапия болгаш кардиология салбырларын ынаар көжүрген. Ындыг болганда, Ленин кудумчузунда эрги ийи каът оран-сава хосталы берген. Поликлиниканы калбартыры-биле ук оран-саваны ажыглаар деп шиитпирлээш, аңаа капитал септелгени кылган.
Поликлиникада быжыглаттынган 30 муң ажыг кижини чаарттынган оран-савага келир неделяда хүлээп эгелээр. Чаа оран-савага хүндүскү стационар болгаш тускай эртемниг специалистерниң кабинеттерин ажыдар.
“Капитал септелге соонда, чаа оран-саваже киргени-биле, поликлиниканың кол оран-савазында лифт айтырыы шиитпирлеттинип турар – деп, кол эмчиниң оралакчызының хүлээлгезин күүседип турар Шончалай Кара-Сал демдеглээн. – Шагда туттунган оран-савага лифт тудуунуң дугайында чугаа чоруп турда, чүгле немелде акша-хөреңги эвес, а инженерлиг шиитпирлер негеттинер амыр эвес айтырыг болуп турар. Чаарттынган эптиг оран-саваже пациентилер өөрүшкү-биле келир боор деп бодап тур мен”.
Ук оран-саваның капитал септелгези “Кадык камгалалы” национал төлевилелдиң бирги звенозунуң чаартылга программазы-биле кылдынган.
/ Тываның Кадык камгалал яамызының медээлеринден.
