Национал гвардияның Сибирьде шериг округунуң командылакчызының оралакчызы генерал-майор Андрей Батрак Тываның Баштыңы Владислав Ховалыгга Росгвардияның Тывада эргелелиниң чаа удуртукчузу полицияның полковниги Алексей Корниенкону таныштырган. Ужуражылганың үезинде регионнуң удуртукчузу республиканың социал-экономиктиг байдалы болгаш эрге-хоойлу камгалаар органнар-биле кады ажылдажылганың байдалы-биле Корниенкону таныштырган.
Полицияның полковниги Алексей Николаевич Корниенко Красноярск крайның Новониколаевка суур чурттуг. Россияның ИХЯ-зының Сибирьде юридиктиг институдун дооскан. Корум-чурум камгалаар органнарга албан-хүлээлгезин 1994 чылдан бээр эрттирип турар. Национал гвардияның одуруунда 2016 чылдан бээр. Росгвардияның Тывада эргелелиниң даргазынга томуйлаттырарының бетинде
Росгвардияның Хакасияда эргелелиниң начальнигиниң оралакчызынга ажылдап турган. Тускай шериг операциязынга киржип турган. Күрүне шаңналдарлыг: «Эрес-дидим чорук дээш» медаль, «Ада-чурттуң мурнунга ачы-хавыяазы дээш» деп орденниң I болгаш II чергелери, «Ниитиниң корум-чурумунуң камгалалынга шылгараңгай ажылы дээш» деп медаль-биле шаңнаткан.
Росгвардияның Тывада эргелелиниң удуртукчузу турган Андрей Кука РФ-тиң национал гвардиязының федералдыг шерииниң Астрахань областа эргелелин даргалай берген.
"Шын" №53, 2023 чылдың июль 19