| Кывар-чаар чүүлдер-биле хандырылга |
«Роснефть» күрүне компанияның кол күүседикчи директору Игорь Сечин чуртта кывар-чаар материалдар-биле байдал нарын дээрзин демдеглээш, ооң чылдагааны нефть болбаазырадыр заводтарның чамдыызы чайгы үеде септелгени кылып турары, часкы, чайгы үеде көдээ ажыл-агый адырында ажылдың кидин түлүк үези, чурттакчы чоннуң автотранспорту чылыг үеде үргүлчү ажыглап, аргыжарының көвүдээни дээш өске-даа чамдык байдалдар деп ол айыткан.
Кывар-чаар материалдарны кудуп садар станцияларче чорударында кызыгаарлаашкыннар болгаш үзүктелиишкиннер «Роснефть» компанияның талазындан чогун, компанияның болбаазырадып бүдүрген кывар-чаар материалдарының барык шуптузу Россияның иштинде ажыглаттынып турарын, чуртта кывар-чаар материалдар рыногун болгаш өртектерни компания хайгаараар, ооң-биле холбаштыр чогуур шимчээшкиннерни кылыр апаар дээрзин массалыг информация чепсектеринге Игорь Сечин дыңнаткан.
Амгы үеде «Роснефть» компанияның кывар-чаар чүүлдер кудуп садар ийи станциязы Кызыл хоорайның Тиилелгениң 75 чылы болгаш Калинин кудумчуларда ажылдап турар. Күрүнениң киржилгези-биле ажыл-чорудулгазын боттандырып турар «Роснефтиниң» бо станциялары Тываның кывар-чаар материалдар-биле хандырылгазын үзүктелдирбезинге, оларның өртектерин хенертен хөй улгаттырбазынга салдарлыг болган.
Тывада автотранспорт аймаан кывар-чаар чүүлдер-биле хандырылганың байдалын болгаш өртектерниң деңнелин кичээнгейге ап көргеш, кывар-чаар материалдарны регионнуң хереглелиниң хемчээлинге хандырар дугайында чагыгны республиканың удуртулгазы “Роснефть” күрүне компаниязынче чоруткан. Ол чагыгны Россияның Энергетика яамызының одаар чүүл болгаш энергетика башкарылгазының төп оперативтиг штавынга сайгарып көргеш, Тыва Республиканың шупту кожууннарында кывар-чаар чүүлдер станцияларын “Роснефть” күрүне компаниязының кывар-чаар материалдар курлавырындан хандырар шиитпир хүлээп алдынган.
“Роснефть” күрүне компанияның кывар-чаар чүүлдер станцияларын Кызылга тудар дугайында дугуржулга 2021 чылда Тываның Баштыңы Владислав Ховалыгның ук компанияның үстүкү удуртулгазы-биле ужуражыышкыннарының үезинде чедип алдынган.
Тывада бензин өртээниң улгадып турар чылдагааннарының бирээзи – республикада хууда станциялар кывар-чаар материалдарның биржа садыглаашкыннарынга киржип шыдавазы, бензинни нефть болбаазырадыр компаниялардан дорт садып алыр арга чогу, бензин бүдүрүкчүлери биле хереглекчилерниң аразында янзы-бүрү хевирниң сайгарлыкчы компаниялардан садып алыр ужурга таваржып турары.
/ Бистиң корр.
Ада ТЮЛЮШТУҢ тырттырган чуруу.
“Шын” №24 2026 чылдың июнь 25
"Шын" солуннуң МАХ-каналынга каттыжыңар: max.ru/join/egenQ...