Донорларга чаа дүрүмнер
2027 чылдың январь 1-ден эгелеп Кадык камгалал яамызы донорларга хамаарыштыр чаарттынган дүрүмнерни боттандырар. Ооң иштинче бирги процедура мурнунда дүрген шинчилгелер база донорларның анкеталарын шыгжаар үезин саазын хевирге 30 чыл, а электроннуг хевирге 50 чыл чедир улгаттырары кирип турар. Ооң мурнунда ол чүгле 5 чыл турган.
Ипотека дыштанылгазы
Хереглекчилер чээлизиниң хоойлузунга өскерилгелерни киирген. Ийи дугаар болгаш ооң соонда төлү төрүттүнгенде азы азырап алган таварылгада өг-бүлелер 18 ай дургузунда ипотека дыштанылгазын алыр азы төлевирниң түңүн эвээжедир аргалыг болур. Шак ындыг арганы чээли төлеп турар үеде чаңгыс катап ажыглаар.
Беш ажыл хүнүнүң дургузунда көөр
Сентябрь айдан тура ажыл берикчилери долу эвес ажыл хүнүнүң дугайында билдириишкинни 5 ажыл хүнүнүң дургузунда өөренип көөр апаар. Ооң мурнунда хоойлуга ындыг чүүл турбаан. Долу эвес ажыл хүнүн иштиг херээженнерге база 14 хар четпээн уругну кижизидип турар ада-иениң бирээзинге ажыл берикчизи албан доктаадыр ужурлуг.
Билетке чүнү демдеглээрил?
Хөй-ниити транспортунуң билеттеринге аргыштырылга чорудуп турар транспорттуң хевири, сериязы, дугаары, албан чериниң азы кижиниң ады турар ужурлуг. Чогуур өскерилгелерни РФ-тиң Орук-транспорт яамызының дужаалында киирген. Колдуунда билеттиң өртээ болгаш аргыштырылганың девискээри турар ужурлуг. Бо дүрүмнер 2032 чылдың сентябрь 1-ге чедир күштүг.
“Буянныг оюннар” төлевилели
2026 чылдың сентябрь 1-ден тура бүгү чурттуң уруглар садтарында “Буянныг оюннар” төлевилелин боттандырып эгелээн. Школа назыны четпээн уруглар өөредилгезиниң чылынга тураскааткан хемчеглер планын ёзугаар уруглар Россияның ниитилелинде хүлээп алдынган үндезин үнелиг чүүлдерни оюн дузазы-биле өөренип алыр.
Ук программа 5-тен 7 хар чедир уругларның уруглар садындан эге школаже шилчиир социал сайзыралынга ажыктыг. Ол ышкаш “Орлята-дошколята” деп бүгү-российжи төлевилел база эгелээр. Бо төлевилел бичии уругларга таарыштырган «Россияның эзирлери» деп программаның хевири болур.
“Буянныг оюннар” төлевилели-биле неделя дургузунда уругнуң сайзыралынга ажыктыг чугаалажылгалар болгаш угаан сайзырадыр кичээлдер эрттирери көрдүнген. Пятница хүннеринде кижизиттирикчилер аразынга эрткен кичээлдерни түңнээр сайгарылгалар болур. Төлевилелди РФ-тиң Чырыдыышкын яамызы болгаш Чашкы үе, өг-бүле болгаш кижизидилге шинчилээр институт харыылап турар.
Айыыл чок чоруктуң хемчеглеринге немелде
Россияның школаларында ЭРА-ГЛОНАСС системазынче кожуп каан дүрген дуза кыйгырар кнопкалыг мобильдиг платформа ажылдап эгелээн. «ГЛОНАСС» АН-ның дыңнатканы-биле алырга, сентябрь 1-ден эгелеп Татарстанның болгаш Пенза облазының өөредилге черлеринге ажыглалче кирер. Ооң соонда Москва облазынче, улаштыр бүгү чуртка киирерин шиитпирлеп турар.
Өөредилге чериниң башкылары болгаш ажылдакчылары капсырылга таварыштыр халдаашкын, өрт, чигзинчиг чүүлдер тывылганы азы заложниктерге туттурган дээн ышкаш айыыл-халап дугайында чаңгыс кнопка базыышкыны-биле дыңнадып болур. Үн азы бижимел арга-биле дамчыдар немелде арга база көрдүнген. Дыңнадыгны дораан харыылаары-биле регионалдыг “112” системазынче дамчыдыптарга, өөредилге албан чериниң шак ындыг капсырылганы киирип алган ажылдакчыларынга шуптузунга чеде бээр. Капсырылганы App Store болгаш Google Play-ден киирип алыр. Ону ажылдадырда, албан чери ажылдакчыларын кожар чөпшээрелди алыр.
Орук озал-ондак дугайында медээни дамчыдары-биле бир дөмей: объектиниң болгаш айыыл-халаптың канчаар болу бергениниң дугайында медээни дүрген дуза чедирер албан черлеринче дораан дамчыдар дээрзин Компанияның чиңгине директору Алексей Райкевич тайылбырлаан. Бо чаа чүүл айыыл чок чоруктуң амгы хемчеглеринге немелде болур. 11 чыл дургузунда ажылдап келген «ЭРА-ГЛОНАСС» 14 миллион ажыг машиналарны каттыштырбышаан, ада-чурттуң навигациязынга үндезилеттинген делегейде бир дугаар дыңнадыг системазы болуп артканын демдеглээри чугула.
“Макс” таварыштыр шынзылганы көргүзүп болур
Сентябрь 8-тен тура чолаачылар Күрүне автоинспекциязының ажылдакчыларынга машина башкарар шынзылгазын болгаш транспорттуң бүрүткелиниң дугайында херечилелин “Макс” капсырылгазын таварыштыр көргүзүп болур аргалыг апарган. Автоюрист Лев Воропаевтиң тайылбырлааны-биле алырга, бо чаартылга документилерниң боттарын бодунга албайн барып болур арганы бээр. Чарлык албан езузу-биле күш кирген-даа болза, ооң техниктиг боттандырылгазынга элээн үе негеттинерин ол демдеглээн. Электроннуг хевир дээрге анаа-ла чуруктар эвес, а күрүнениң ачы-дуза порталы-биле холбашкан тускай код болурун билип алыры чугула. Оон ыңай инспекторнуң мобильдиг харылзаазы үстү берген таварылгада саазын документилерни негей бээрин Воропаев сагындырган. Ынчангаш саазын документилерни машиназынга шыгжап чоруурун ол саналдаан.
Чыжыргана СААЯ белеткээн.
Медээлерни болгаш чуруктарны ТАСС-тан алган.
“Шын” №35 2026 чылдың сентябрь 10
"Шын" солуннуң МАХ-каналынга каттыжыңар: max.ru/channel_shyn