Автошколага өөрениринге чиигелделер
Күрүне Думазының Өг-бүле камгалаар, ада, ие болгаш чаштар талазы-биле комитединиң даргазының бирги оралакчызы Роза Чемеристиң чугаазы-биле алырга, бо хемчег бүдүн өг-бүлеге немелде деткимчени бээр. Үш азы оон хөй ажы-төлдүг херээженнерниң автошколага өөредилгезинге чиигелделер өг-бүлеге эптиг аргыжылганы хандырар болгаш камгаладылганың бир хевири болур.
Ооң мурнунда Президент Владимир Путин хөй ажы-төлдүг иелерниң автошколага өөрениринге чиигелделерни өөренип көөрүн Россияның регионнарынга сүмелээн. Парламентарий ону бүдүн өг-бүлениң камгалалы, ол ышкаш уругларның херек кырында аргыжылгазы болгаш айыыл чок чоруу деп адаан. Хөй ажы-төлдүг херээжен кижиге машина аянзыыр чүүл эвес, а амыдырап-чурттаарының кол чепсээ апарганын Р. Чемерис демдеглээн: “Хөй ажы-төлдүг өг-бүлелерде ада кижи колдуунда ажылдап, өг-бүлени азырап, а хөй кезиинде чуртталгазының чартыын машина мунуп эрттирип турар. Ынчалза-даа кажан өөнүң ээзи ажылдап турда, амыдыралдың бүгү бергелери херээжен кижиниң эктинге дүжер”.
Ооң иштинде эмнелге, школа, ажы-төлдүң сайзыралынга ажыктыг бөлгүмнер баары, ол ышкаш хөй ажы-төлдүг өг-бүлеге аъш-чем садып чоруптары кирип турар. Үш-дөрт ажы-төлдү эдертип алгаш, хөй-ниити транспортунга чорууру хүн бүрүде хилинчек-човулаң апаарын депутат демдеглээн.
Орулга даңзызынче киирбес
Күрүне Думазының Өг-бүле камгалалының, ада, ие болгаш чаштар талазы-биле комитединиң кежигүнү Наталья Москвитинаның чугаазы-биле алырга, уруг төрүттүнгенде төлээр чаңгыс катап төлээр төлевирлер өг-бүлениң орулгазы көвүдей берген, доктаамал дуза хереглевес апарганын илеретпейн турарын ТАСС дыңнаткан.
Ук төлевирни орулга санаашкынының баазазындан ап кааптар болза, чаңгыс аай пособиеже билдириишкин киирерде, өг-бүлелерниң хереглелин түңнээри чөптүг апаарын Наталья Москвитина демдеглээн.
Күрүнениң демографтыг болгаш өг-бүле политиказын боттандырар чөвүлелдиң хуралының түңнелинде, РФ-тиң Президентизи Владимир Путин ол дугайын өөренип көөрүн чазакка дааскан. Ону 2027 чылдың июнь 1-ге чедир кылыр ужурлуг.
Чаш төл төрүттүнерге чарыгдалдар албан көвү- дээр — ынчангаш федералдыг субъектилер немелде чаңгыс катап төлевирлерни берип турар ужуру ол. "Ынчалза-даа уруг төрүттүнген дээш өг-бүлениң алган дузазы орулга кылдыр санаттынар апаар – ооң түңнелинде өг-бүле чаңгыс аай пособие алыр эргезин чидирип болур. Бо байдалды эде көөр херек" — деп, парламентарий тайылбырлаан.
Көдээ черниң шагдаа ажылдакчызы
Россияда «Көдээ черниң шагдаа ажылдакчызы» деп программаны эгелээр дугайында саналды киирген. Күрүне Думазының кежигүнү база Ыраккы Чөөн чүктүң болгаш Арктиканың хөгжүлдезиниң талазы-биле комитеттиң даргазының оралакчызы Максим Иванов ук девискээрлерге комплекстиг хөгжүлде негеттинип турарын тайылбырлааш, ук программаны Россияга эгелээрин ол саналдаан.
Өске мергежилдерде ол бар, а «Көдээ черниң шагдаа ажылдакчызы» чок. Бистиң ыраккы суурларывыстың хөй кезиинде, чедери берге черлерде, полиция чок болганындан, кожа-хелбээ черлерден шагдаалар кээп турар” – деп, М. Иванов чугаалаан.
Ындыг төлевилел-биле шагдаа ажылдакчызы ырак черже тодаргай үе дургузунда ажылдап чорупкаш, төлевирлерни алыр. "Ол аңаа келгеш, ажылдааш, 2 млн рубль чедир акшаны ажылдап ап, ол черге чурумну тургузуп кааш, олчаан аңаа чурттап артып каар-даа чадавас. Ол кончуг чөптүг. Бир эвес бис ол девискээрлерни хөгжүдер херек дээр болзувусса, оларны бүрүнү-биле хөгжүдер херек" – деп, М. Иванов чугаалаан.
Ийи пенсия алыр эргелиг
Күрүне Думазы кымның ийи пенсия алыр эргелиг дээрзин тайылбырлаан. Ол эрге хамааты стажы бар шериг албанныгларга, чок болган шериг албанныгларның ада-иелеринге болгаш дайынга кемдээшкин алган кижилерге хамааржыр дээрзин Күрүне Думазының Күш-ажыл, социал политика болгаш хоочуннар херектериниң талазы-биле комитединиң даргазының бирги оралакчызы Дарья Лантратова демдеглээн.
Ниити дүрүм езугаар Россияның хамаатылары чүгле чаңгыс пенсия алыр ужурлуг, ынчалза-даа дүрүмге чагыртпас таварылгалар база бар. "Шериг пенсияже үнген кижи ниити пенсия назы-харынга чеде берген, 15 чыл хамааты стажтыг, 30 пенсия баллы бар болза, ведомство пенсиязынга камгаладылга пенсиязын немеп болур" – деп, Д.Лантратова чугаалаан.
Ол-ла эрге Ада-чурттуң Улуг дайынынга киришкен, Ленинград блокадазының чурттакчыларынга, Севастополь биле Сталинградты бүзээлеткен хамаатыларга база хамааржыр. Космонавтылар болгаш шенелде ужудукчулар ийи пенсия алыр эргелиг кижилер аразында аңгы категорияга хамааржыр деп Д. Лантратова немээн.
«Социал фондунуң чон хүлээп алыр албаны-биле харылзажып азы Күрүне ачы-дуза порталын таварыштыр билдириишкинни киирип болур. Ийиги төлевирни алыр эрге бар бе дээрзин олар хынаар» – деп, депутат түңнээн.
/ Чыжыргана СААЯ.
Медээлерни болгаш чуруктарны ТАСС-тан алган.
“Шын” №44 2026 чылдың ноябрь 12
"Шын" солуннуң МАХ-каналынга каттыжыңар: max.ru/channel_shyn