Шрифт
А А А
Фон
Ц Ц Ц Ц Ц
Изображения
Озвучка выделенного текста
Настройки
Обычная версия
Междубуквенный интервал
Одинарный Полуторный Двойной
Гарнитура
Без засечек С засечками
Встроенные элементы
(видео, карты и т.д.)
Вернуть настройки по умолчанию
Настройки Обычная версия
Шрифт
А А А
Фон
Ц Ц Ц Ц Ц
Изображения
Междубуквенный интервал
Одинарный Полуторный Двойной
Гарнитура
Без засечек С засечками
Встроенные элементы (видео, карты и т.д.)
Вернуть настройки по умолчанию

Сөөлгү оруунче изиг адыш часкаашкыннары-биле үдээн

16 января 2023
4

Тываның В.Көк-оол аттыг Национал хөгжүм-шии театры, тыва көрүкчү, чоок дөргүл-төрели РФ-тиң болгаш Тываның улустуң артизи Люндуп Иргитович Солун-оолдуң чырык өртемчейден чарлып чорутканы-биле аар болгаш улуг чидиригге таварышкан.

«...Кижи кырыыр, ооң дүнү дүжер
Мээң үем база келир!
Ада-ием, мени төрүп, өстүрүп кааныңар дээш
Силерге мөгейдим!
Сеңээ база, Хүн, мөгейдим!
Чуртталгага хилинчектенип,
Каттырып, ыглап чорааным дээш мөгейдим!
Ачылыг хүн!
Мээң эш-өөрүм, төрел-дөргүлүм, арат-чонумга
чырыыңны болгаш, чылыыңны шаңна... »
Бо одуругларны чоннуң ынак артизи дириг чорааш, чонунга номчуп чораан болза, кажыыдалдыг бо хүнде соонда артып калган чонунга Чуртталгага ынак чоруурунга сөөлгү чагыы болуп дыңналган.
Бөгүн, январь 16-да, Национал театрның ийиги каъдынга Улуг артист-биле байырлажыр ёзулалга театрның бүгү коллективи, чоок дөргүл-төрели, Бай-Тайгадан чаңгыс чер-чурттуглары, хөй-ниити организациялардан төлээлер, хөйге билдингир алдар-аттыг культура ажылдакчылары, культураның хоочуннары, албан организациялар удуртукчулары дээш хөй кижи чыглып, киришкен. Оларның аразында Тываның Баштыңы Владислав Ховалыг биле культура сайыды Виктор Чигжит чоннуң ынак артизинге сөөлгү мөгейиин кылып, байырлашкан.
“Тыва театрның сылдызы, Россияның болгаш Тываның Улустуң артизи Люндуп Иргитович Солун-оолду бөгүн сөөлгү орукче үдеп тур бис. Онзагай аянныг үнү-биле ооң күүсеткен ырлары, чечен-чогаалдары, шүлүктери, шоодуглуг баснялары тыва чоннуң чүрээнге кезээ мөңгеде артар. Тыва Чазактың, тыва чоннуң болгаш бодумнуң өмүнээмден Люндуп Иргитовичтиң өөнүң ишти Зоя Дамба-Сюрюновнага, уругларынга, чоок кижилеринге база ооң уран чүүлүнүң мөгейикчилеринге ханы кажыыдалды илередип тур мен”- деп, Тыва Республиканың Чазак Даргазы Владислав Ховалыг хөйнүң кажыыдалын үлежип, чугаалаан.
Болган сөөлгү ёзулалга сөс ап чүве чугаалаан улус шупту Люндуп Солун-оолдуң тыва чонунга кайы хире ынак чораанын, кижилерге эки хамаарылгазы-биле хүндүткелдиг турганын сактып, чугаалап турганнар. Ооң каттаптаттынмас байлак чогаадыкчы ажыл-ижи, көрүкчүнүң сеткил-сагыжын өрүмнеп кире бээр кылдыр ойнаан рольдары уттундурбас артканын демдеглеп, чечен сөстүң кайгамчык мастери болурундан аңгыда ырлаарынга база тергиин артист чораан дээрзин хөй кижи чугаалаан.
Ёзулал адакталып, чоннуң ынак артизин сөөлгү оруунче үдээр шак келгенде, Люндуп Иргитовичиниң күүселдезинде “Я люблю тебя, Жизнь” деп ыр театрга чаңгыланы берген. Улуг өгбезин үдеп турган артистер болгаш ооң чоок улузу карак чажын тудуп чадап турган-даа болза, артист кижини изиг адыш часкаашкыннары-биле үдээр ёзулалды сагып, байырлашкан.
Чедер чериңер чырык, чыдар чериңер чымчак болзун, ынак артизивис Люндуп Иргитович Солун-оол!

false
false
false
false
false
false
false
false
false