Республиканыӊ эрге-чагыргазы «Сибирь» - S7 Airlines» улуг авиакомпанияны кады ажылдаар партнёру кылдыр дугуржуп турарыныӊ дугайында Тываныӊ Баштыӊы Владислав Ховалыг эрткен чылын Дээди Хуралга (парламентиге) Айыткалынга чугаалаан.
Компанияныӊ төлээлери кады ажылдаарынга сонуургалдыг болган. А Кызылдыӊ аэропортунга чогуур сертификацияны албан эртип алыры негеттинип келген. Чурттар аразынга аргыжар рейстерни хүлээп алыры-биле, ужудуп-хондурар шөлдү чаартып кылган. S7 компанияныӊ Эмбрайэр маркалыг самолеттарын аӊаа ужудуп-хондуруп болур, шупту стандарттарынга дүгжүп турар болган.
Тываныӊ найысылалынче баштайгы дорт рейс келир неделяныӊ вторникте Новосибирскиден ужуп келир. Эмбрайэр 170 эптиг самолет вторник, четверг, суббота хүннеринде — бир неделяда үш катап ужудар дээрзин авиакомпанияныӊ парлалга албаны дыӊнадып турар.
S7 5381 рейс Новосибирскиден 6.40 шакта ужуп үнгеш, Кызылга 8.20 шакта келир. Кызылдан S7 5382 рейс 9.20 шакта ужуп үнгеш, Толмачёво аэропортка 11.00 шакта хонар.
Бир улуг кижиниӊ эконом-класс билединиӊ өртээ 6,5 муӊ рубль. Орукка 1 шак 40 минута хире болур.
Тываныӊ Чазааныӊ медээзи-биле Р. Демчик белеткээн.