Май 14-те Тыва Республиканың Экономиктиг сайзырал болгаш үлетпүр яамызының, ТР-де Сайгарлыкчы чорукту деткиир фондунуң удуртулгазы-биле, республикада Сайгарлыкчы чорук неделязынга тураскааткан хемчеглер эгелээн. Ажыл-чорудулгазы аңгы-аңгы адырларга хамааржыр-даа болза, боттарының бизнезин чедиишкинниг шуудады бергени-биле чаңгыс чүткүл, бодалдыг апарган сайгарлыкчыларны ук хемчеглерже чалаан.
Кызыл хоорайда Аныяктар ордузунда “Мээң бизнезим: Бот-хандыртынган чоруктан боттуг бизнесче” деп аттыг шуулган үезинде, республикада боттарын ажыл-биле хандырган хамаатылар сайгарлыкчы чорукче баштайгы базымнарының, оруунга таварышкан шаптараазыннарны канчаар ажып эрткенин, өөредиглиг семинарларга киржилгезин, чыыштар кандыг ажыктыг болганының дугайында боттарының үзел-бодалдары-биле солчур.
Май 15-те К.Б. Ондар аттыг Тыва үндезин культура төвүнге, “Кластерлиг сайзырал төвү-биле креативтиг индустрияны хөгжүдериниң дугайында” стратегтиг сессия ажылдаар.
Май 16-да Азия төвү скульптурлуг комплексте “Туризм бажыңынга” «Мээң бизнезим: Мээң акша-хөреңгим» деп семинар күзелдиг кижилерни чалап турар.
Кызыл хоорайда республиканың сайгарлыкчылар аллеязын чаагайжыдып, аштап-арыглаарын майның 17-де планнаан. Субботник ТР-ниң Сайгарлыкчылар аллеязынга болур.
Сайгарлыкчы чорук неделязының эң улуг хемчээ — регионнар аразында «Енисей Экспо–2024» универсалдыг садыг-саарылгалыг делгелге май 17–19 хүннеринде “Сүбедей” спорт комплекизинге ажылдаар. Аңаа кожа-хелбээ Абакандан, Новосибирскиден, Красноярскыдан, Кемероводан, ол ышкаш Моолдан сайгарлыкчылар киржир. Бо чылын Алтай крайның бүдүрүлгелери бодунуң барааннарын бир-ле дугаар делгеп, бараалгадыр. Делгелгеге аъш-чем, идик-хеп, пөс-таавы кылыгларын, тудуг материалдарын, бажың эт-севин, садыг-саарылга дериг-херекселин, автомобильдерни, мотоциклдерни, тускай техникаларны делгээр.
Май 21-де К.Б. Ондар аттыг Тыва үндезин культура төвүнге “Регионда улусчу ус-дарганнаашкын адырында сайгарлыкчы ажыл-чорудулганы хөгжүдериниң аргалары болгаш күрүнеден деткимче хемчеглери” деп темага “төгерик столду" организастаар.
Россияда Сайгарлыкчы чорук хүнүнүң бүдүүзүнде, республикага эрткен Сайгарлыкчы чорук неделязының сөөлгү хүнү — май 24-те, Аныяктар ордузунга “Мээң бизнезим” мөөрейниң түңнелин үндүрүп, 2023 чылдың эң тулган сайгарлыкчыларының адын адап, шаңнап-мактаар.
В. Путинниң идип үндүргени, Россияда сайгарлыкчы чорукту бүгү талалыг экижидеринче угланган “Биче болгаш ортумак сайгарлыкчы чорукту деткиири” национал төлевилел хамаатыларның бодун ажыл-биле хандыртынар ажыл-чорудулгазынга таарымчалыг байдалдарны тургузуп, бизнести эгелеп алырынга эге идигни берип турарын сагындыраал.
А. МОНГУШ.
Ада ТЮЛЮШТУҢ тырттырган чуруктары.
«Шын» №35 2024 чылдың май 15
