Майның 26-да демдеглээр Российжи сайгарлыкчы чорук хүнүнге тураскааткан чаңчылчаан бизнес-декаданың ажыл-агыйжы хемчеглери бо неделяда Тывага база уламчылаар. Тываның Баштыңы Владислав Ховалыг эрткен пятницада тус черниң бизнес ниитилежилгезиниң төлээлери-биле ужуражып тура, республикада сайгарлыкчылар саны өскенин демдеглээн.
"Улуг үүрмек садыглажылга-биле ажыктыг чижилгени тургузарының, тус черниң сервизин хөгжүдериниң база кадрларның мергежилин бедидериниң айтырыгларын сайгарып чугаалашты- выс” – деп, Тываның Баштыңы ужуражылга соонда социал четкилерде бодунуң блогунда дыңнаткан. Тус черниң садыг баартыктары боттуң продукциязы-биле долган турарын чедип алыр дээш, улуг күжениишкиннерни салып турарын киржикчилерге дыңнаткан. "Ол бисте бар, аңаа сонуургал база бар, ынаар маркетплейстер безин үнүп турар. Күш-ажылчы орулганың чугулазын кады суртаалдаар херек" – деп, Владислав Ховалыг түңнээн.
Сайгарлыкчы чорук неделязында хемчеглер ам-даа уламчылаар. Май 25-те боттарын ажыл-биле хандыртынган кижилерниң III-кү республика шуулганы болур.
Май 26-да Кызылда Сайгарлыкчы чоруунуң аллеязын чаагайжыдар.
Май 27-де «Авангард» деп ТР-ниң аныяктарның шериг-патриотчу кижизидилгезиниң өөредилге-методиктиг төвүнүң девискээринге сайгарлыкчы чорук субъектилериниң ортузунга спартакиада болур.
/ Бистиң корр.
"Шын" №37 2023 чылдың май 23