Тыва Арат Республика ССРЭ-ниң составынче киргенинден бээр 80 чыл болганын демдеглээн байырлалы-биле республиканың кожууннарында хоочуннар Тыва Чазакка болгаш ниити чонга байыр чедириишкиннерин чоруткан.
Оларның бирээзи Эрзин кожуунга эң баштайгы бажың туттунуп турар үеден бээр хөгжүлделиг төөгүнүң дириг херечизи, төрээн кожуунунга бүгү назынында башкылап келген 84 харлыг хүндүлүг хоочун, Тыва Республиканың алдарлыг башкызы Александра Идамовна Дирчин:
– Тыва Арат Республиканың ССРЭ-ниң составынче киргенинден бээр 80 чыл болганын демдеглээн бо төөгүлүг байырлал-биле сагыш-сеткилимниң ханызындан бүгү Тываның чонунга, удуртукчуларынга изиг байырым дамчыдып олур мен! Эрткен 80 чыл дургузунда Төрээн Тывавыстың канчаар хөгжүп келгенин караам-биле көрүп, күрүнениң ажыл-агыйынга бар күжүм-биле үлүүм киириштирип ажылдааш, амгы үеде республикавыстың кайгамчыктыг хөгжүлдезин көрүп, өөрүп чор мен. Улуг-биче чонга быжыг кадыкшылды, сүлдези бедик болурун күзеп, чер-чуртун, бойдузун, төрээн дылын чүден артык камнап чоруурун чагып чугаалаксаар-дыр мен. Улуг назылыгларны утпайн, оларның байлак дуржулгазын үлегерлеп, төөгүнү билип алыры-биле, аныяк-өскен олар-биле харылзааны үспес болурун күзедим. Тывавыс ам-даа хөгжүүр болзун!
Тыва Республиканың ордениниң кавалери, Россияның “Хүндүлел демдээ” ордениниң эдилекчизи, Тыва Республиканың Күш-ажылының маадыры, Хүндүлүг хамаатызы, РФ-тиң база ТР-ниң көдээ ажыл-агыйының алдарлыг ажылдакчызы, Моолдуң “Поляр сылдызы” дээди шаңналының эдилекчизи, Мөңгүн-Тайганың Мөген-Бүрен аттыг күрүнениң унитарлыг бүдүрүлгезин барык дөртен чыл удуртуп келген удуртукчузу, 80 харлыг хоочун Өшкү-Саар Аракчааевна Ооржак:
– Бо төөгүлүг юбилейлиг байырлал таварыштыр бүгү Тываның ажыл-ишчи чонунга, республиканың күүсекчи болгаш хоойлужудулга эрге-чагыргазының удуртукчуларынга байыр чедирип, Төрээн Тывавыстың хөгжүлдези дээш мурнунда салган сорулгалары боттанып турарын күзедим! 80 харлыымга чедир дөрт дугаар салгал-биле ажылдаар аас-кежиктиг болдум. Мынчага чедир ажылдап чоруурум дээрге, бүгү чонумнуң, ажыл-ишчи мөңгүн-тайгажыларның ачы-хавыяазы-дыр. Чазак-чагырганың мурнунда салган сорулгаларын чедип алыр дээш, шуптувустуң демниг кылган ажылывыс үре-түңнелдиг болуп турары – езулуг ажылынга бердинген бөдүүн ишчи чоннуң ачызы. Тока үезинден эгелеп ажылдааш, дыка хөй даргаларның солушканын көрдүм. Кандыг-даа күрүнениң хөгжүлдези көдээ суурлардан эгелээр. Хүлээнген ажылынга шынчы бердинген бөдүүн ишчи кижилерниң ачызында, чазак-чагырганың деткимчези-биле чуртувус бурунгаар сайзыраар. Байырлал-биле, хүндүлүг чонум!
Бистиң корр.
«Шын» №78 2024 чылдың октябрь 12
