Май 5-тиң аяс, чылыг хүнүнде Кызылдың хоочуннар болгаш инвалидтер бажың- интернадының чурттакчылары Барыын-Хемчик кожуунда Кызыл-Мажалыктың 2 дугаар ортумак школазынга аалдап четтивис. Аңаа «Салгалдар харылзаазы» деп төлевилел-биле өөреникчилер болгаш хоочуннар аразынга солун ужуражылганы эрттирген. Ужуражылга үезинде салгалдар удур-дедир концерттер база үндүрдүвүс.
Үш каът школаның арыг-силиин, чаражын магададывыс. Бисти тыва дыл башкызы Марта Тараачыновна Сарыглар уткуп хүлээп алды. Бо школада тыва дылды сайзырадып турары дыка онза-дыр. Школаның столоваязынга бисти аъшкарып-чемгерип, чылыг-чымчак сөстер чугаалап, дыка-ла хүндүледи.
Улаштыр Тывавыстың ыдыктыг, чоннуң чүдүп-тейлээр черлери Бижиктиг-Хаяга, Кижи көжээге, Үттүг-Хаяга, Үстүү-Хүрээге четтивис. Арыг агаарның онзазын чүү дээр ону. Чүдүлге бистиң тываларның шаг шаандан сагып келген чаңчылывыс-тыр. Ынчангаш ыдыктыг черлерге баарга, мага-боттуң кадыы экижиир, омак-сергек апаар, буян-кежик ала-чайгаар келир.
Бисти шак мындыг онзагай черлерге агаарладып, дыштанып алзын дээш, чоруткан даргаларывыс Херел Игоревич биле Аяс Сергеевичиге, Буян Богбалдаевичиге база бисти ырак-узак черже чедирген чолаачывыс Март-оол Хүлер-ооловичиге, удуртуп-башкарып чораан библиотекарывыс Людмила Төмүр-ооловнага, клуб эргелекчизи Артыш Сааяга, хоочуннар даргазы Тамара Чамзановнага улуу-биле өөрүп четтиргенивисти илередир-дир бис. Оларга аас-кежикти, өөрүшкүнү, каң дег кадыкшылды база чон-биле ам-даа эки ажылдаарын күзедивис.
/ Светлана СААЯ.
Чурукту Кызыл-Мажалыктың 2 дугаар школазының социал четкиде арнындан алган.
“Шын” №19 2026 чылдың май 21
"Шын" солуннуң МАХ-каналынга каттыжыңар max.ru/join/egenQ...