Тываның Баштыңы Владислав Ховалыг бодунуң социал четкиде блогунга республиканың чурттакчы чонунга Бүгү-делегейниң уруглар камгалалының хүнү-биле байыр чедирип тура, хөй ажы-төлдүг өг-бүлелерлиг Тывага республиканың хөгжүлдезинге болгаш чаагайжыдылгазынга уруглар кол шимчедикчи күш болуп турарын онзалап демдеглээн.
«Ада-иелерге, кырган-аваларга, башкыларга болгаш кижизидикчилерге четтирдивис. Силерниң хүн бүрүде сагыш човаашкыныңар болгаш шыдамык чорууңар салгалдарга келир үеже бүзүрелдиң таваа-дыр»– деп, Владислав Ховалыг чугаалаан. Мурнувуста чайгы дыштанылга. Кол сорулгавыс – уруг бүрүзүнге хөглүг болгаш айыыл чок дыштанылганы организастаары дээрзин база ол демдеглээн.
«Ажы-төлүвүске уттундурбас солун болуушкуннарны, ужуралдарны дыштанылга сөңнээр болзун. Регионнуң өг-бүле бүрүзүнге амыр-тайбың, өөрүшкү, чаагай чорук доктаар болзун!» – деп, В. Ховалыг чугаалааш, «Ажы-төл дыштанып турда, оларның келир үези дээш школаларны, уруглар садтарын, спортчу шөлдерни ам-даа немей тудар бис» – деп, ол чугаалаан.
Байырлал хүнүнде Тываның Чазааның бажыңынга ТР-ниң Баштыңы Владислав Ховалыг республиканың аңгы-аңгы булуңнарында чурттап чоруур уруглар-биле ужурашкан. Оларның аразында өөредилгеге тергиидээннер, регионалдыг болгаш Россия чергелиг спортчу маргылдааларның тиилекчилери, чогаадыкчы мөөрейлерниң кол шаңналдарының эдилекчилери, волонтёржу шимчээшкиннерниң идепкейжилери бар.
Салым-чаяанныг, чедиишкинниг уруглар, оолдар-биле ужуражылга чылыг болгаш найыралдыг байдалга эрткен.
Владислав Ховалыг ажы-төлге Уруглар камгалалының хүнү-биле байыр чедиргеш, оларның чедиишкиннери тура-соруктуң болгаш күш-ажылдың чырыткылыг үлегери дээрзин онзалап демдеглээн. Ооң бодалы-биле алырга, салым-чаяанныг чаштар ниитилелге онза байлак, чурттуң экономиктиг, социал, культурлуг хөгжүлдезинге салдар чедирип турар күштүг интеллектуалдыг курлавыр-дыр.
Кандыг-даа чедиишкин – кызымаккай күш-ажылдың, онзагай мөзү-бүдүштүң, тура-соруктуң, сонуургалдың түңнели дээрзин Владислав Ховалыг онзалап демдеглээн. Бо шынарлар чажындан эгелеп хевирлеттинер болза, олар келир үеде амыдыралдың чедиишкиннериниң «таваан» салыр.
Ажы-төлдүң чедиишкиннери ада-иезиниң болгаш өг-бүлезиниң быжыг деткимчезинден, оларга күш-ажылчы, харыысалгалыг, ниитилелге үлүг-хуузун киирер күзелди оттуруп турарындан тыптып турар дээрзинге Владислав Ховалыг бүзүрелин илереткен. Чүнү-даа чедип алгаш, ук-төөгүзүн, өг-бүлезин, төрээн черин кажан-даа утпас ужурлуг дээрзин сагындырган.
Тургузукчу күш-ажылдың болгаш өг-бүле ыдыктарының чылында ындыг үлегер-чижектер кончуг чугула. Тура-соруу болгаш бодунуң күзелдеринге бердинген чоруу ооң бодунга эң-не эки үре-түңнелди бээр. Силер дээш чоргаарланыр бис»– деп, регионнуң Баштыңы түңнээн.
Тываның Баштыңы-биле ужуражылгадан аңгыда, салым-чаяанныг ажы-төлге Тываның Чазааның бажыңының иштинге экскурсияны база организастаан.
А. ОНДАР белеткээн.
Медээни болгаш чурукту ТР-ниң Чазааның парлалга албанындан алган.
“Шын” №21 2026 чылдың июнь 4
"Шын" солуннуң МАХ-каналынга каттыжыңар: max.ru/join/egenQ...