Тываның девискээрлеринде санитарлыг арыглаашкын кампаниязы кидин түлүк чоруп турар. Республиканың бүгү хоорай, суурларында март төнчүзүнде эгелээн арыглаашкын ажылдары май айның төнчүзүнге чедир уламчылаар. Кудумчулар аштап-арыглаар ажылдарже коммунал ажыл-агый ажылдакчылары, школачылар, ажыл чок хамаатылар база албан черлериниң коллективтери неделя санында үнүп эгелээн. Чурттап турар бажыңнарының девискээрлерин чурттакчылар чаңчыл ёзугаар боттары аштап-арыглап турар.
Төп кудумчулар болгаш шөлдерге, парктарга, сесерликтерге, ылаңгыя тус чер чурттакчыларының сонуургалын оттурган «Чурттаар оран-сава болгаш хоорай хүрээлеңи» национал төлевилелдиң «Таарымчалыг хоорай хүрээлеңин хевирлээри» деп федералдыг программазында кирип турар девискээрлерни аштап-арыглаары бирги ээлчегде.
Хар ам-даа эки эривээн чамдык кожууннарның чурттакчылары эрткен неделяда субботниктерже үнүп эгелээн. Чижээлээрге, санитарлыг арыглаашкын кампаниязының стартын Таңды кожуунда база алган. Тус черниң чагырга чери албан организациялар арыглаашкын ажылынга идепкейлиг киржип турарын демдеглээн: «Кожууннуң бүгү албан черлериниң ажылдакчыларынга өөрүп четтиргенивисти илередип тур бис. Чурттакчы бүрүзүн бо чугула ажыл-херекке каттыжарын кыйгырып тур бис. Силерниң күжениишкинниг ажылыңарның ачы-дузазында кудумчуларывыс, парктарывыс болгаш хөй-ниити девискээрлеривис арыг-силиг болгаш ногаан болур».
Чеди-хөлчүлер база субботниктерде идепкейлиг киржип кирипкен. Девискээрлерге санитарлыг арыглаашкын чорудар акцияны пятница, суббота санында организастаар кылдыр чарлаан.
Кызыл кожууннуң бүгү организациялары апрель 5-тен тура санитарлыг арыглаашкын ажылдарын эгелээн. Апрель айның бир дугаар субботнигинде 796 кижи киришкен. Хөйнүң күжү-биле 98 куб бокту аштап, чыгган.
Эрткен чылын Тывага арыглаашкын ажылдары дөрт неделя үргүлчүлээн, ол үе дургузунда хоорай, суурларга ниитизи-биле 60 дөрбелчин километр девискээрни арыглаан.
Алдынай СОЯН.
Чуруктарны интернет четкизинден алган.
«Шын» №31 2024 чылдың апрель 24
