Кызыл хоорайның социал камгаладылга чериниң “Серебрянка” санаторийже дыштаныр путёвканы алгаш, дыштаныр аас-кежиктиг болдум. Мен, III бөлүктүң инвалиди кижи, чугула херек эмнээшкинни 5 хонук дургузунда эрттирдим. Июнь айның эгезинден ортузунга чедир 55 кижи эмнетпишаан, мага хандыр дыштанып алдывыс.
Санаторийге чаа келген дыштаныкчылар хостуг үезинде боттарын таныштырып, уран талантызын бараалгадыры чаңчыл апарган. Шак мындыг культура-массалыг хемчеглерни Дадар-ооловна кончуг эки удуртуп турган.
“Серебрянкада” колдуунда чартыктап аараан улус эмнедип, дыштанып турар. Оларның аразында коляскада олурар 8 ие бар. Өөнүң ээлери оларны ажаап карактааннар. Республиканың кайы-даа булуңундан дыштанып келген кижилер бар: Сүт-Хөл кожуундан, Эрзинниң Качык сумузундан, Чаа-Хөлдүң Кызыл-Дагдан, Бай-Тайганың Кара-Хөлден. Оларның аразында Сүт-Хөл кожууннуң «Алдан-Маадыр» совхозунга директорлап, арга-дуржулгалыг ажылдап чораан Макар Донгактың өг-бүлези аажок эки дыштандылар. Өг-бүлениң ишти Елизавета Донгак Тыва Республиканың “Шылгараңгай ажылы дээш” деп медалының эдилекчизи.
Эрзин кожууннуң Качык сумузунуң Культура бажыңының директору Зинаида Сундуй “Авай” деп ырыны моол дылга, Ховаа Сүүзүнмаа “Ынакшылды камнаар болза” деп ырыны күүсеткеннер. Фаина Сарыговна ырлаар-даа, дыштанып келген улусту хөгледир-даа база бир онзагай кижи. Алдарлыг саанчы Часкым Кожага ырлаар-даа, самнаар-даа. Алдарлыг акушер эмчи Елизавета Күжүгет 80 харлап чоруур. Кара-Хөлдүң кадыр-берт черлеринге аът мунуп алгаш, аалдар кезип, сааттыг иелерни божудуп чораан хөй-хөй шаңналдарның эдилекчизи, Ооржак уктуг эрес-шоваа эмчи-ле болгай.
Чылбак МОНГУШ, РФ-тиң хүндүлүг башкызы, «Шынның» хоочун бижикчизи.
"Шын" №57, 2023 чылдың август 2