Сөөлгү каш чылдарда эге школа өөреникчилерин халас изиг чем-биле хандырар дугайында шиитпирни РФ-тиң Чазаа хүлээп алган. 1-ден 4-кү класска чедир уруглар, оолдарны школага хоолулуг, шынарлыг чем-биле хүннүң-не кичээлдер аразында узун чапсар үезинде чемгерген турар ужурлуг.
Эге школа өөреникчилерин чемгерер акша-төгерикти регионалдыг болгаш федералдыг бюджеттен аңгылаан. Республиканың школа бүрүзүн чемненилге комбинаттары: «Школачы чемненилге» МУБ, «Школьник» МУБ, «Куулар» ХБ, «Монгуш Ч. А.» ХБ, «Куржу Б.Е.» ХБ, “Дамдын Е.Н.” ХБ, “Хомушку Ш.Ю” ХБ дээш өске-даа хууда сайгарлыкчылар керээ езугаар хандырып турар.
Чоокта чаа Кызыл хоорайның 18 дугаар школазынга эге школа өөреникчилери хораннанганын шупту билир бис. Ук байдалга хамаарыштыр чогуур ажылдар чоруттунуп турар.
Дүүн Кызылдың 8 болгаш 5 дугаар школаларынга тырттырар бөлүк-биле четкеш, ада-иелер, башкылар болгаш школачылар-биле чугаалаштывыс.
8 дугаар школаның 1-ги классчыларының ада-иелериниң төлээзи Марина Виноградова:
– Эрткен неделяда, сентябрь 11-де, школада изиг чемге хамаарыштыр хыналданы ада-иелерниң тускай комитеди кылган бис. Школаның столоваязынга келиривиске арыг-силиг, чырык болду. Ажы-төлүвүстү эптиг-демниг, найыралдыг коллектив чемгерип турарын көрдүвүс. Ада-иелерниң сонуургааны айтырыгларның доозазынга ажылдакчылар харыылап берди. Уругларның чип турар чеми амданныг болгаш шынарлыг чорду. 1-ги классчы уруум өөренгеш, тодуг-догаа келир-дир. Столоваяның ниитизи-биле арыг-силиин база хынаар бис. Тавакта салган чемни деңзилээш, күрүне стандарттарынга дүгжүп-дүүшпейн турарын, уругларның чем чип турар аяк-шынаанда чирик, тиглиг сава-саңга бар-чогун база көрдүвүс. Комитетте класс бүрүзүнден чаңгыс төлээ бар. Хынаар бетинде школаның администрациязын сагындырыптар-дыр бис.
8 дугаар школаның повары Саяна Ооржак:
– Ниитизи-биле 1000 хире уругну изиг чем-биле чемгерип, 11 кижи ажылдап турар бис. Дөрт повар, а артканнары аяк чуур, аштап-арыглаар улус. Бир дугаар хүнде кадык, четвергтерде балыктан, а арткан хүннерде дагаа болгаш инек эъдинден кылган чемни уруглар чип турар. Вафли, печенье, пряник, конфет, фрукт дээш бир-ле чигирзиг чемни немей берип турар. Салаттарны неделяда 3 катап берип турар бис. Суксун аймаанга хөй кезиинде чыжыргана, инек-караа, ыт-кады, киш-кулаа дээн ышкаш витаминниг, эм каттардан кылган хандыларны уруглар ижип турар.
8 дугаар школаның 3 «а» клазының башкызы Тайгира Салчактың медеглээни-биле алырга, клазында 36 өөреникчи бар. Уругларның чемненири эки, тавакка чем арттырбайн чиптер. Чамдык уруглар бажыңынга чемненип алган боор. Столоваяже келбейн баар.
8 дугаар школаны изиг чем-биле «Школьник» МУБ хандырып турар.
Айдың ОНДАР.
Буян ООРЖАКТЫҢ тырттырган чуруу
“Шын” №71 2023 чылдың сентябрь 20
