ОЖУУМ ДАЖЫ
Чуртталгамның дазыл-дөзүн турулдурбас,
Чуртум орнун ээнзиретпес ожуум даштары
Артыш оглум, ийи кызым кезээ шагда
Амыдырал-чуртталгамның чула оду.
Ачазының кыпсып кааны ыдык одааның
Салгал дамчыыр изиг одун өжүрбестер.
Алыс шынның кокпазынга буян тарып,
Салгалдарым, уйнуктарым өзүп кээрлер.
Чүректерниң ачы-буянныг хөрзүнүнге
Чүүлдештир эки чүүлдер частыры дег,
Үрезиннер тыпчып, тутчуп мандып үнүп,
Үш-ле дөстен үш чүс чедир чечектелир.
Чуртталгамның дазыл-дөзүн турулдурбас
Чуртум орнун ээнзиретпес ожуум даштары.
КАДЫ ЧОР СЕН
Чоон чажың, хүлүмзүрүүң,
Чылыг куспааң, эргеледииң,
Чараш чаңың, чугаакырың
Сагыжымга дыка эргим.
Арга-эзим ыраажызы
Айлаң-кушка адың атташ.
Айлаңмаа деп ырлаптар мен,
Айлаң кушкаш улажы бээр.
Чүлдү-чүрээм ханызынга
Чуртталганың уязын тип,
Ындын ырым аялгазы,
Ынакшылым, кады чор сен.
ОДААВЫСТЫ ӨЖҮРБЭЭЛИ
Ынакшылым чажыт эжии
Ынды-бети ажык турда,
Кадыр арттар, хемнер, хөлдер
Кажанда-даа моондак болбас.
Ыдык черим чечектерин
Ынаам кыска чулуп алгаш,
Ыры-шоорлуг, омак-сергек,
Ыраан билбейн чеде бээр мен.
Караңгы дүн шаптык болбас,
Харын айым чырыын чажар.
Одаавысты кывыскаштың,
Ону черле өжүрбээли.
1992 ч.
КҮСТҮҢ ӨҢҮ
Шак бо күстүң алдын-сарыг
Чараш өңүн сагындырар
Чалыы үем шагда оңган –
Шаам-биле чурттап чор мен.
Кижилерге буян кадып,
Кидин түлүк ажыл кылып,
Арын-нүүрүм баксыратпайн,
Амыдырап чурттап чордум.
Шак бо күстүң алдын-сарыг
Чараш өңүн сагындырар
Чалыы үем эглип келбес –
Чаңгыс ол-ла хомуданчыг.
2025 ч.
/ Омак КЫРГЫС.
Өвүр кожуун.
“Шын” №16 2026 чылдың апрель 30
"Шын" солуннуң МАХ-каналынга каттыжыңар max.ru/join/egenQ...