Тускай шериг операциязында киржип турар чаңгыс чер чурттугларывыска Чаа чылдың байырлалын уткуштур Тывадан ээлчеглиг гуманитарлыг дузаны декабрь 22-де аъткарыпкан. Соок кыш удур 3 тонна инек, сарлык болгаш хой эъдин Тывадан чорудуп турары бо.
Хоорайның хем ол чарыында «Правобережный» садыг-саарылга төвүнге баш удур чыып белеткеп каан эътти Тываның күрүне университединиң болгаш Тываның информастыг технологиялар техникумунуң студентилери, сургуулдары «Кады бис» деп регионалдыг волонтёрлар штавының кежигүннери ниитизи-биле сес кижи чүдүрген.
«Ооң мурнунда база волонтёржу ажылдарга чаңгыс эвес удаа киржип турдувус. Бөгүн тускай шериг операциязында киржип турар акыларывыска, чаңгыс чер чурттугларывыска байырлал таварыштыр чедирер эътти чүдүрүп тур бис – деп, Шоваа Маадыр-оол чугаалады.
Бо удаада гуманитарлыг дузаны ТР-ниң Дээди Хуралының төлээзи үдеп чедирер харыысалганы хүлээнип алган.
ТР-ниң Дээди Хуралының депутады Ульяна Моңгуш:
– Кол чүъгүвүс – тыва хой эъди. Дайынчыларывыска инек, аът, сарлык болгаш хой эъдин чедирер дээш, чүдүрүп турарывыс бо. Ниитизи-биле 3 тонна эътти Тываның араттары дузаламчы кылдыр эккелген.
Чижээлээрге, күчүтен мөге Аяс Моңгуш, «Малчын» КУБ-туң директору, «Заря» көдээ ажыл-агый бүдүрүлге чери дээш аңгы-аңгы хууда сайгарлыкчыларның эккелген эъдин чүдүрүп алгаш чоруурувус бо. Эъттен аңгыда, чоннуң чыгганы янзы-бүрү белек-селектер болгаш суугуларны чүдүрүптү.
Гуманитарлыг дузаны ийи хууда сайгарлыкчының автомашиналары-биле чедирер. Чолаачыларның аразында чоокта чаа ТШО-дан чанып келген хамааты база бар. Чижээлээрге, дөрт ажы-төлдүг Артыш Домбаа өскелерден үлегер ап, гуманитарлыг дуза чедиреринге бодунуң үлүг-хуузун киирер деп бодап алгаш, узун орукче аъттаныпканы ол.
«Гуманитарлыг дуза чедирип турар хамаатылар дугайында чаңгыс эвес удаа солун-сеткүүлдерден номчуп, телевизордан көрдүм. Эки туразы-биле дуза чедирип чоруп турар хамаатыларның үлегер-чижээн көргеш, бодум база ол буянныг чоруктуң киржикчизи болуксааш, тулчуушкунда чаңгыс чер чурттугларывыска дуза чедирер деп шиитпирледим» – деп, Артыш Домбаа чугаалады.
Гуманитарлыг дуза чедирер санында «Кады бис» регионалдыг волонтёрлар штавының кылып чорудуп турар ажылын үнелээри чугула. Чүге дээрге студентилер, сургуулдар кичээлдерин каггаш, чүък чүдүрер дээш кээп турар дээрзин сагындыраал.
А. ОНДАР.
Ада ТЮЛЮШТУҢ тырттырган чуруктары.
“Шын” №98 2023 чылдың декабрь 23
