Тывадан шериглер болгаш оларның чоок кижилери Москва хоорайда төлевир чок хостелге чурттаар аргалыг. Бо эгелээшкин Тываның Баштыңы Владислав Ховалыгның тускай шериг операциязының киржикчилерин бүрүнү-биле деткииринче угланган даалгалары-биле боттанып турар.
Хостел 2023 чылдың декабрь айда Москва хоорайда Тыва Республиканың Бүрүн эргелиг төлээ чериниң болгаш “Изида” ачы-дуза фондузунуң аразында дугуржулгага атты салганының ачызында ажыттынган. Бо документ шериг албанныгларны болгаш өске-даа дуза хереглээн хамаатыларны деткиир талазы-биле кайы-даа таланың кады ажылдажылгазын көрүп турар.
Түр үеде төлевир чок чурттаар оран-сава бир дугаарында шериг албанныгларга болгаш ооң чоок кижилеринге, ол ышкаш Москваның болгаш Москва облазының эмнелгелеринге чыдып эмнедир, арга-сүме алыр, шинчилге эртери-биле квоталар алган Тываның чурттакчыларынга көрдүнген.
Хостелдиң ажыттынганындан бээр ук ачы-дузаны барык 400 хире кижи алган. Оларның иштинде 121 шериг албанныглар, 139 оларның өг-бүлелериниң кежигүннери, 75 эмнедип келген улус, 61 аарыг кижилерни үдеп келген кижилер бар. Оон аңгыда, түр үениң чурттаар черин амыдыралы берге байдалга келген 2 студентиге база дуза болган.
Ачы-дуза алыкчылары хостелдиң ажыының улуун демдеглеп, төлевир чок чурттаар арганы берип турарынга өөрүп четтиргенин илередип турарлар. Ол Тываның чурттакчыларынга Москвага чурттаарын чиигедип, сагыш-сеткил дүвүрелин оожургадып, эмнелгеде чыдар чоок кижилери дээш сагыш салыышкынны мөөңнээр арганы тургускан.
Хостел Москваның Данилов районунда, “ЗИЛ” болгаш “Технопарк” метро станцияларының чоогунда турар. Ында 12 эр болгаш 6 херээжен кижи чыдар оруннар бар.
Төлевир чок хостелге баарда, каш хонук бурунгаар Москвага чеде бээр хүнүн бодай аарак баш бурунгаар чагыгны киирери чугула. Чагыгларны дараазында телефон дугаарында +7 (499) 236-48-01 болгаш info@pprt17.ru деп электроннуг почта таварыштыр хүлээп турар. Төлээ чериниң хүлээп алыышкыны понедельниктен пятницага чедир Москва шагы-биле 08.30-ден 18.00 шакка чедир ажылдаар. Ынаар чурттап кирерде, паспорт болгаш шериг албанныг деп азы эмнээшкин алыр шынзылга херек.
Тыва Республиканың Чазааның медээлеринден белеткээн.
Чуруктарны интернет четкизинден алган.




